തൃശൂർ > പുത്തൂർ സുവോളജിക്കൽ പാർക്കിനോട് ചേർന്നു കിടക്കുന്ന മാന്ദാമംഗലത്തെ ടൂറിസ്റ്റ് ആകർഷണ കേന്ദ്രമാക്കി മാറ്റുന്നതിന്റെ ഭാഗമായി ഷോപ്പിംഗ് കോംപ്ലക്സും മൾട്ടിപ്ലസ് തിയേറ്ററും അടങ്ങുന്ന കെട്ടിട സമുച്ചയം നിർമിക്കാൻ തീരുമാനമായെന്ന് റവന്യൂ മന്ത്രി കെ രാജൻ. ഇതുമായി ബന്ധപ്പെട്ട കാര്യങ്ങൾ പരിശോധിക്കുന്നതിനായി മന്ത്രി, ജില്ലാ കലക്ടർ വി ആർ കൃഷ്ണതേജ, സാംസ്കാരിക വകുപ്പ് ഡയറക്ടർ എൻ മായ, കെഎസ്എഫ്ഡിസി (കേരള സ്റ്റേറ്റ് ഫിലിം ഡെവലപ്പ്മെന്റ് കോർപ്പറേഷൻ) പ്രതിനിധികൾ എന്നിവരടങ്ങുന്ന ഉന്നതതല സംഘം സ്ഥലം സന്ദർശിച്ചു.സാംസ്കാരിക വകുപ്പിന് കീഴിലാണ് മൾട്ടിപ്ലസ് തിയറ്റർ ഉൾപ്പെടെയുള്ള കോംപ്ലക്സ് നിർമിക്കുക. മാന്ദാമംഗലം വില്ലേജ് ഓഫീസിനോട് ചേർന്ന് കിടക്കുന്ന ഒന്നര ഏക്കറോളം സ്ഥലത്താണ് കോപ്ലക്സ് നിർമ്മാണം ലക്ഷ്യമിടുന്നത്. ഇതുമായി ബന്ധപ്പെട്ട വിശദമായ രൂപരേഖ തയ്യാറാക്കി സാംസ്കാരിക വകുപ്പിന് നൽകാൻ മന്ത്രി ജില്ലാ കളക്ടർക്ക് നിർദ്ദേശം നൽകി.
ഒരാഴ്ചയ്ക്കകം രൂപരേഖ സമർപ്പിക്കാനാണ് നിർദ്ദേശം. പുത്തൂർ സുവോളജിക്കൽ പാർക്ക്, പുത്തൂർ കായൽ, പീച്ചി ഡാം, ചിമ്മിനി ഡാം തുടങ്ങിയ പ്രധാന കേന്ദ്രങ്ങളുമായി ചേർന്ന് കിടക്കുന്ന മാന്ദാമംഗലത്തെ മികച്ച വിനോദ സഞ്ചാര കേന്ദ്രമാക്കി മാറ്റുമെന്ന് മന്ത്രി പറഞ്ഞു. ഇതിന്റെ ഭാഗമായി മികച്ച അടിസ്ഥാന സൗകര്യങ്ങൾ ഒരുക്കുകയെന്ന ലക്ഷ്യത്തോടെയാണ് കോംപ്ലക്സ് നിർമാണത്തിന് പദ്ധതിയിടുന്നത്. ഒല്ലൂക്കര ബ്ലോക്ക് പഞ്ചായത്ത് പ്രസിഡന്റ് കെ ആർ രവി, പുത്തൂർ പഞ്ചായത്ത് പ്രസിഡന്റ് മിനി ഉണ്ണികൃഷ്ണൻ, വൈസ് പ്രസിഡണ്ട് അശ്വതി സുനീഷ്, പഞ്ചായത്തംഗങ്ങൾ, തൃശൂർ തഹസിൽദാർ ടി ജയശ്രീ, വിവിധ രാഷ്ട്രീയ കക്ഷി പ്രതിനിധികൾ, ബന്ധപ്പെട്ട വകുപ്പ് ഉദ്യോഗസ്ഥർ എന്നിവരും സന്ദർശന സംഘത്തിൽ ഉണ്ടായിരുന്നു.
