കൊച്ചി> 2023ലെ വുമൺ ഇൻ അക്വാകൾച്ചർ സ്കോളർഷിപ്പ്, കേരള യൂണിവേഴ്സിറ്റിയിൽ സുവോളജി വിഭാഗത്തിൽ ഗവേഷണം നടത്തുന്ന അനഘ രാജുവിന് ലഭിച്ചു. നോർവേ ആസ്ഥാനമായ KVAROV ARCTIC നൽകുന്ന ഈ സ്കോളർഷിപ്പ് 10000 ഡോളറിന്റതാണ്. ഗവേഷണം പൂർത്തിയാക്കുന്നതിന് ആവശ്യമായ മറ്റ് സാങ്കേതിക പിന്തുണകളും നൽകുന്നതിലൂടെ സ്ത്രീ ശാക്തീകരണമാണ് ഇവർ ലക്ഷ്യമാക്കുന്നത്. റീ സർക്കുലേറ്റിംഗ് അക്വാകൾച്ചർ സിസ്റ്റംസ് (RAS) എന്ന സാങ്കേതികവിദ്യയിലൂടെ ചുരുങ്ങിയ ചെലവിൽ മത്സ്യകൃഷി നടത്തുന്ന ഗവേഷണ പദ്ധതിയാണിത്. കേരളത്തിൽ RAS യൂണിറ്റുകൾക്ക് സ്ഥിരമായി വരുന്ന പ്രശ്നങ്ങൾ പരിഹരിക്കുകയും,കൂടുതൽ കാര്യക്ഷമമായ ഒരു സിസ്റ്റം വികസിപ്പിച്ചെടുക്കുകയും ചെയ്യുകയാണ് ഇതിന്റെ ലക്ഷ്യം.
ഇന്ത്യയിൽ നിന്നും ഈ സ്കോളർഷിപ്പ് ലഭിക്കുന്ന ആദ്യ വനിതയാണ് അനഘ. 50 രാജ്യങ്ങളിലെ അപേക്ഷകരിൽ നിന്നും തെരഞ്ഞെടുക്കപ്പെട്ട അനഘ രാജു കേരള യൂണിവേഴ്സിറ്റിയിൽ ഡോ. എഫ്. ജി. ബെന്നോ പെരേരയുടെ നേതൃത്വത്തിലാണ് ഗവേഷണം നടത്തുന്നത്. കായംകുളം എരുവ ചേനാത്ത് സർവീസ് സെന്റർ ഉടമ രാജുവിന്റെയും, ഹരിപ്പാട് ഗവ. ഹൈസ്കൂൾ അധ്യാപിക ജിജിയുടെയും മകളാണ്.
