കൊച്ചി: ദേഹാസ്വാസ്ഥ്യം അനുഭവപ്പെട്ടതിനാൽ കരുവന്നൂർ ബാങ്ക് അഴിമതിക്കേസിൽ എൻഫോഴ്സ്മെന്റ് ഡയറക്ടറേറ്റ്(ഇ.ഡി) ചോദ്യംചെയ്യലിനിടെ കേരള ബാങ്ക് വൈസ് ചെയർമാൻ എം.കെ. കണ്ണനെ ചോദ്യം ചെയ്യുന്നത് ഇന്ന് അവസാനിപ്പിച്ചതായി ഇ.ഡി. ചോദ്യം ചെയ്യാനായി കണ്ണന് വീണ്ടും നോട്ടീസ് നൽകും.എന്നാൽ ഒരു തരത്തിലുള്ള ശാരീരിക പ്രശ്നവും ഉണ്ടായിട്ടില്ലെന്നും തികച്ചും സൗഹാർദപരമായ ചോദ്യങ്ങളാണ് ഉണ്ടായിരുന്നതെന്നും കണ്ണൻ പ്രതികരിച്ചു. ചോദ്യംചെയ്യല്‍ പൂര്‍ത്തിയാക്കിയെന്ന് പറയാന്‍ കഴിയില്ലെന്നും എപ്പോള്‍ വിളിച്ചാലും വരണ്ടേയെന്നും അദ്ദേഹം ചോദിച്ചു. സതീഷ്‌കുമാറിന്റെ നിക്ഷേപവുമായി ബന്ധപ്പെട്ട ചോദ്യത്തോട്, അത്തരം വിവരങ്ങള്‍ താന്‍ പങ്കുവെക്കാനില്ലെന്നായിരുന്നു പ്രതികരണം. ഇന്ന് രാവിലെ 11 മണിയോടെയാണ് കണ്ണൻ ചോദ്യം ചെയ്യാൻ ഇ.ഡി ഓഫിസിൽ ഹാജരായത്.
ചോദ്യം ചെയ്യൽ നാലു മണിക്കൂർ പിന്നിട്ടപ്പോൾ കണ്ണന് ദേഹാസ്വാസ്ഥ്യമുണ്ടായി എന്നും അതിനാൽ ചോദ്യം ചെയ്യൽ ഇന്നത്തേക്ക് അവസാനിപ്പിക്കുകയായിരുന്നുവെന്നുമാണ് ഇ.ഡി അറിയിച്ചത്. നിലവിൽ തൃശൂർ സർവീസ് സഹകരണ ബാങ്കിന്റെ പ്രസിഡന്റാണ് എം.കെ കണ്ണൻ. ഈ ബാങ്കു വഴി വലിയ രീതിയിലുള്ള ബിനാമി ഇടപാടുകൾ കരുവന്നൂർ ബാങ്ക് തട്ടിപ്പ് കേസിലെ ഒന്നാം പ്രതിയായ സതീഷ് കുമാർ നടത്തിയുണ്ടെന്നായിരുന്നു ഇ.ഡിയുടെ കണ്ടെത്തൽ. മറ്റു സർവീസ് സഹകരണ ബാങ്കുകളിലെ തിരിച്ചടവ് മുടങ്ങിയ വായ്പകൾ തൃശൂർ സർവീസ് സഹകരണ ബാങ്കിലേക്ക് മാറ്റാൻ നിർദേശം നൽകിയത് എം.കെ കണ്ണനാണ് ഇ.ഡിയുടെ കണ്ടെത്തൽ. ഈ കാര്യങ്ങളിൽ വ്യക്തത വരുത്താനാണ് ഇ.ഡി ഇദ്ദേഹത്തെ ചോദ്യം ചെയ്യുന്നത്.
