കൊല്ലം : ഭർത്താവ് പെട്രോൾ ഒഴിച്ചതിനെത്തുടർന്ന് അടുപ്പിൽനിന്ന് തീപിടിച്ച് ഭാര്യ മരിച്ചു. നീണ്ടകര നീലേശ്വരം തോപ്പിൽ ശരണ്യഭവനിൽ ശരണ്യ(35)യാണ് മരിച്ചത്. ഭർത്താവ് എഴുകോൺ ചീരങ്കാവ് ബിജു ഭവനത്തിൽ ബിനു (40) ചവറ പോലീസിൽ കീഴടങ്ങി. വെള്ളിയാഴ്ച രാവിലെ ആറരയോടെയായിരുന്നു സംഭവം. ഇരുവരുടെയും പ്രണയവിവാഹമായിരുന്നു. ഒരാഴ്ചമുമ്പ് വിദേശത്തുനിന്നെത്തിയ ബിനുവും ശരണ്യയും എഴുകോണിലെ വീട്ടിലായിരുന്നു താമസിച്ചിരുന്നത്. രണ്ടുദിവസം മുമ്പാണ് ബിനുവുമായി വഴക്കിട്ട് ശരണ്യ നീണ്ടകരയിലെ വീട്ടിലെത്തിയത്.
പോലീസ് പറയുന്നതിങ്ങനെ കൊലപ്പെടുത്തണമെന്ന ഉദ്ദേശ്യത്തോടെ എഴുകോണിൽ നിന്ന് നീണ്ടകരയിലെത്തിയ ബിനു പെട്രോളുമായി ശരണ്യയുടെ വീടിനു സമീപം ഒളിച്ചിരുന്നു. ശരണ്യയുടെ അച്ഛൻ സൈക്കിളിൽ പുറത്തുപോയ സമയത്താണ് ബിനു അടുക്കളയിലെത്തി പാചകംചെയ്തുകൊണ്ടിരുന്ന ഭാര്യയുടെ ദേഹത്ത് പെട്രോളൊഴിച്ചത്. അടുപ്പിൽനിന്ന് തീ ശരണ്യയുടെ ദേഹത്തേക്ക് പടർന്ന് ഗുരുതരമായി പൊള്ളലേറ്റു. പെട്രോൾ ഒഴിക്കുന്നതിനിടയിൽ ബിനുവിന്റെ കൈക്കും പൊള്ളലേറ്റു. ശരണ്യയുടെ നിലവിളികേട്ട് ഓടിക്കൂടിയവർ ഉടൻതന്നെ കൊല്ലത്തെ സ്വകാര്യ ആശുപത്രിയിലെത്തിച്ചു. വെള്ളിയാഴ്ച വൈകീട്ട് മരിച്ചു. നിമിഷ, നിഖിത എന്നിവർ മക്കളാണ്. ബിനുവിന്റെ അറസ്റ്റ് രേഖപ്പെടുത്തി കോടതിയിൽ ഹാജരാക്കി.
