വാളയാർ > വാളയാർ എക്സൈസ് ചെക്ക്പോസ്റ്റിൽ നടത്തിയ വാഹന പരിശോധനയ്ക്കിടെ രേഖകളില്ലാതെ കടത്തിയ 40.715 ലക്ഷം രൂപയുമായി ഒരാളെ പിടികൂടി. തൃശൂർ ചാലക്കുടി കോടശേരി ചട്ടികുളം വടശേരി സ്വദേശി ബിജീഷ് (41) ആണ് പിടിയിലായത്. തമിഴ്നാട്ടിൽനിന്ന്‌ കേരളത്തിലേക്കുവന്ന സ്വകാര്യബസിൽ നടത്തിയ പരിശോധനയ്ക്കിടെയാണ് പണം കണ്ടെത്തിയത്.
തുടർനടപടിക്കായി പ്രതിയെ വാളയാർ പൊലീസിന് കൈമാറി. വാളയാർ എക്സൈസ് ഇൻസ്പെക്ടർ കെ നിഷാന്ത്, പ്രിവന്റീവ് ഓഫീസർമാരായ പി എൻ രാജേഷ്‌കുമാർ, സൽമാൻ റസാലി, സിവിൽ എക്സൈസ് ഓഫീസർമാരായ വി കെ ബിജു, എം പ്രമോദ്, നിതീഷ് ഉണ്ണി എന്നിവർ പരിശോധനയിൽ പങ്കെടുത്തു.
മൂന്നു ദിവസത്തിനുള്ളിൽ എക്സൈസ് പിടികൂടിയത് 70 ലക്ഷം രൂപ
പാലക്കാട് > മൂന്നു ദിവസത്തിനുള്ളിൽ വാളയാറിൽ നിന്നു മാത്രമായി എക്സൈസ് പിടികൂടിയത് 70 ലക്ഷം രൂപ.
തൃശ്ശൂർ സ്വദേശി ബിജീഷിൽ നിന്ന് രേഖകൾ ഇല്ലാതെ കൊണ്ടുവന്ന 40.71 ലക്ഷം രൂപയാണ് ഇന്ന് എക്സൈസ് കണ്ടെടുത്തത്. ഇക്കഴിഞ്ഞ 13ന് ഇതേ ചെക്ക്പോസ്റ്റിൽ എക്സൈസ് ഇൻസ്പെക്ടർ പ്രദീപ്‌ വി എസും സംഘവും ചേർന്ന് നടത്തിയ വാഹനപരിശോധനയിൽ മഹാരാഷ്ട്ര സ്വദേശിയുടെ പക്കൽ നിന്നും രേഖകൾ ഇല്ലാതെ കൊണ്ടുവന്ന 30 ലക്ഷം രൂപ കണ്ടെടുത്തിരുന്നു.
