തൃശൂർ: പെരുമ്പിലാവ് പൂങ്കുന്നം ദേശാഭിമാനി പ്രസ്സിനു സമീപം ബൈക്കും ബസും കൂട്ടിയിടിച്ച് വിദ്യാർഥി മരിച്ചു. പെരുമ്പിലാവ് പൂഴിക്കുന്നത്ത് അസ്‌ലമിന്റെ മകന്‍ അൻസിൽ (18) ആണ് മരിച്ചത്. രാവിലെ ഒൻപതോടെയായിരുന്നു അപകടം. കോഴിക്കോട് ഭാഗത്തേക്കു പോകുന്ന ലിമിറ്റഡ് സ്റ്റോപ്പ് ബസ്, അൻസിൽ സഞ്ചരിച്ചിരുന്ന ബൈക്കിൽ ഇടിക്കുകയായിരുന്നു. തൽക്ഷണം മരിച്ചു.
തൃശൂരിൽ എൻട്രസ് ക്ലാസിന് പോകുന്ന വഴിക്കാണ് അപകടം സംഭവിച്ചത്. പെരുമ്പിലാവ് അൻസാർ സ്കൂളിലെ പ്ലസ് ടു വിദ്യാർഥിയായിരുന്നു. പിതാവ് വിദേശത്താണ്. മാതാവ് നിഷയുടെ പെരുമ്പിലാവിലെ വീട്ടിലാണ് കുടുംബം ഇപ്പോൾ താമസിക്കുന്നത്. പുന്നയൂർക്കുളത്ത് പുതുതായി പണിത വീട്ടിലേക്കു താമസം മാറാനുള്ള തയാറെടുപ്പിലായിരുന്നു. സഹോദരൻ: അമിൻ.
