കൊച്ചി: നടിയെ ആക്രമിച്ച കേസിലെ ഒന്നാം പ്രതി സുനില്കുമാറിന്റെ (പള്സര് സുനി) അമ്മ ശോഭനയില് നിന്ന് അന്വേഷണ സംഘം മൊഴിയെടുത്തു. സുനി 2018ല് അമ്മയ്ക്ക് നല്കിയ കത്ത് പുറത്ത് വന്നതിന് പിന്നാലെയാണ് പോലീസ് നടപടി. കേസില് നടന് ദിലീപിനെതിരെ വെളിപ്പെടുത്തല് നടത്തിയ സംവിധായകന് ബാലചന്ദ്രകുമാറിന്റെ രഹസ്യമൊഴി 12ന് രേഖപ്പെടുത്തും. കേസില് തുടരന്വേഷണത്തിന് സഹായകരമാകുന്ന കത്ത് പോലീസ് കസ്റ്റഡിയിലെടുത്തു. ശോഭനയുടെ രഹസ്യമൊഴി രേഖപ്പെടുത്താന് അന്വേഷണ സംഘം കോടതിയില് അപേക്ഷ നല്കും. 2018 മെയ് 7ന് കോടതിയില് ഹാജരാക്കിയപ്പോഴാണ് പള്സര് സുനി അമ്മ ശോഭനയ്ക്ക് കത്ത് നല്കിയത്. മകന്റെ ജീവന് ഭീഷണിയുള്ളതിനാലാണ് ഇപ്പോള് കത്ത് പുറത്ത് വിടുന്നതെന്നും തനിക്ക് എന്തെങ്കിലും സംഭവിച്ചാല് പുറത്തുവിടണമെന്ന് പറഞ്ഞാണ് കത്ത് സുനി ഏല്പ്പിച്ചതെന്നും ശോഭന പറഞ്ഞിരുന്നു.
ദിലീപ് പറഞ്ഞിട്ടാണ് സുനി നടിയെ ആക്രമിച്ചതെന്നും നടിയോട് സുനിക്ക് യാതൊരു വൈരാഗ്യവുമുണ്ടായിരുന്നില്ലെന്നും ശോഭന വ്യക്തമാക്കിയിരുന്നു. പെരുമ്പാവൂര് ഇളമ്പകപ്പിള്ളിയിലെ വീട്ടിലെത്തിയാണ് ശോഭനയുടെ മൊഴി രേഖപ്പെടുത്തിയത്. നടിയെ ആക്രമിച്ച് പകര്ത്തിയ അപകീര്ത്തികരമായ ദൃശ്യങ്ങള് നടന് ദിലീപ് വീട്ടില് വച്ച് കണ്ടുവെന്നും സാക്ഷികളെ സ്വാധീനിച്ചുവെന്നുമുള്ള വെളിപ്പെടുത്തലിന്റെ അടിസ്ഥാനത്തില് സംവിധായകന് ബാലചന്ദ്രകുമാറില് നിന്ന് പ്രത്യേക അന്വേഷണ സംഘം മൊഴിയെടുത്തിരുന്നു.
