തിരുവനന്തപുരം: മുഖ്യമന്ത്രി പിണറായി വിജയന്റെ പൊളിറ്റിക്കൽ സെക്രട്ടറി പി.ശശിയെ വിമർശിച്ചുള്ള മുൻ മുഖ്യ തിരഞ്ഞെടുപ്പ് ഓഫിസർ ടിക്കാറാം മീണയുടെ ആത്മകഥയ്ക്കെതിരെ പി.ശശി വക്കീൽ നോട്ടിസ് അയച്ചു. തൃശൂരിൽ കലക്ടർ ആയിരിക്കെ വ്യാജക്കള്ള് നിർമാതാക്കൾക്കെതിരെ നടപടിയെടുത്തതിന് അന്നത്തെ മുഖ്യമന്ത്രി ഇ.കെ.നായനാരുടെ പൊളിറ്റിക്കൽ സെക്രട്ടറി ആയിരുന്ന ശശി ഇടപെട്ടു സ്ഥലംമാറ്റി എന്നാണ് മീണ ആത്മകഥയിൽ വെളിപ്പെടുത്തുന്നത്. വയനാട് കലക്ടർ ആയിരിക്കെ സസ്പെൻഡ് ചെയ്തതിനു പിന്നിലും ശശി ആണെന്ന് പുസ്തകത്തിൽ മീണ പറയുന്നു.പുസ്തകം പ്രസിദ്ധീകരിക്കുന്നതിൽനിന്ന് പിന്മാറി മാധ്യമങ്ങളിലൂടെ മാപ്പ് പറയണമെന്നാണ് ശശി വക്കീൽ നോട്ടിസിൽ ആവശ്യപ്പെട്ടിരിക്കുന്നത്. 50 ലക്ഷം രൂപ നഷ്ടപരിഹാരവും വേണം. നാളെ തിരുവനന്തപുരം പ്രസ്ക്ലബ്ബിൽ ശശി തരൂർ എംപിയാണ് മീണയുടെ ആത്മകഥ ‘തോൽക്കില്ല ഞാൻ’ പ്രകാശനം ചെയ്യുന്നത്.
