പട്ന: ഗ്രാമത്തിലുള്ള മറ്റൊരു പുരുഷനുമായി രഹസ്യബന്ധം ആരോപിച്ച് യുവതിയെ ഭർത്താവും ഭർതൃവീട്ടുകാരും ഇലക്ട്രിക് പോസ്റ്റിൽ കെട്ടിയിട്ട് മർദിച്ചു. ബിഹാറിലെ റോഹ്താസ് ജില്ലയിലാണ് സംഭവം. സംഭവത്തിൽ യുവതിയുടെ ഭർത്താവ് ദീപക് റാം അടക്കം അഞ്ചു പേരെ പൊലീസ് അറസ്റ്റു ചെയ്തു.
വെള്ളിയാഴ്ച ദീപക് പൊലീസ് സ്റ്റേഷനിലെത്തി പ്രശ്നത്തിൽ ഇടപെടണമെന്ന് അറിയിച്ചിരുന്നു. ഇതേത്തുടർന്ന് പൊലീസ് ദമ്പതികളെ സ്റ്റേഷനിലേക്കു വിളിച്ചുവരുത്തുകയും ഇവരെ കാര്യങ്ങൾ പറഞ്ഞു ബോധ്യപ്പെടുത്തി മടക്കി അയയ്ക്കുകയും ചെയ്തു. എന്നാൽ തിരികെ വീട്ടിലെത്തിയ ദീപക്കും അയാളുടെ പിതാവ് ശിവ്പുജൻ റാമും മറ്റു മൂന്നു ബന്ധുക്കളും കൂടി ചേർന്ന് യുവതിയെ വീടിനു പുറത്തെ ഇലക്ട്രിക് പോസ്റ്റിൽ കെട്ടിയിട്ട് മർദ്ദിക്കുകയായിരുന്നു. സംഭവമറിഞ്ഞ പൊലീസ് സ്ഥലത്തെത്തിയാണ് യുവതിയെ മോചിപ്പിച്ചത്. ദീപക് റാമുൾപ്പെടെ അഞ്ചു പേർക്കെതിരെ കേസെടുത്ത പൊലീസ് അന്വേഷണം ആരംഭിച്ചു.
