തിരുവനന്തപുരം > സ്വകാര്യ ബസ് ഉടമകളുടെ സമ്മർദത്തിന്‌ സർക്കാർ വഴങ്ങില്ലെന്ന്‌ ഗതാഗതമന്ത്രി ആന്റണി രാജു. സ്വകാര്യ ബസ് സമരം എന്ന വാർത്ത കണ്ട അറിവുമാത്രമാണ്‌. വിദ്യാർഥി കൺസഷൻ പഠിക്കാൻ കമ്മിറ്റി ഉണ്ട്. ഹെവി വാഹനങ്ങളിലെ ഡ്രൈവർമാർക്ക്‌ സീറ്റ് ബെൽറ്റ് നടപ്പാക്കുന്നത്‌ കേന്ദ്ര നിയമപ്രകാരമാണ്‌. ബസുകളിൽ കാമറ വയ്ക്കണമെന്നത് ബസ് ഉടമകളുടെ ആവശ്യമാണ്‌. രണ്ടുമാസം സമയമാണ്‌ അവർ ആവശ്യപ്പെട്ടത്. 10 മാസത്തെ സമയം കൊടുത്തു.
നവംബർ ഒന്നുമുതൽ നടപ്പാക്കണമെന്നത് നേരത്തെയുള്ള തീരുമാനമാണ്‌. ഈ നിയമങ്ങൾ കെഎസ്‌ആർടിസിക്കും ബാധകമാണ്‌. കാമറ ഘടിപ്പിക്കുന്നതിന്‌ 4000 രൂപവരെ ബസ് ഒന്നിന്‌ സബ്‌സിഡി നൽകാമെന്ന് സർക്കാർ പറഞ്ഞു. സമരതീരുമാനത്തിൽനിന്ന്‌ സ്വകാര്യ ബസ് ഉടമകൾ പിന്മാറണം. അതിദരിദ്ര വിദ്യാർഥികളായി സംസ്ഥാനത്ത്‌ ആകെ ഉള്ളത് 850 പേർ മാത്രമാണ്‌. ഇവർക്ക് സൗജന്യയാത്ര നൽകുന്നതിൽ എന്ത് നഷ്ടമാണ് ഉണ്ടാക്കുന്നതെന്ന്‌ മനസ്സിലാകുന്നില്ലെന്നും അദ്ദേഹം മാധ്യമങ്ങളോട്‌ പറഞ്ഞു.
