കോതനല്ലൂർ : ബൈക്കിലെത്തിയ മൂന്നംഗ സംഘം ഓട്ടോ തടഞ്ഞു നിർത്തി ഡ്രൈവറെ ഭാര്യയ്ക്ക് മുൻപിൽ കുത്തി വീഴ്ത്തി. വയറിനും കൈയ്ക്കും കുത്തേറ്റ ഓട്ടോ ഡ്രൈവർ കോതനല്ലൂർ പട്ടമന മാത്യുവിനെ (തങ്കച്ചൻ–53) കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. സംഭവ സ്ഥലത്തു നിന്ന് രക്ഷപ്പെട്ട അക്രമി സംഘത്തെ തിരിച്ചറിഞ്ഞിട്ടില്ല. 3 വർഷം മുൻപ് പ്രദേശത്തെ കഞ്ചാവ് വിൽപന ചോദ്യം ചെയ്ത മാത്യുവിനെ ഒരു സംഘമാളുകൾ ഹെൽമറ്റിന് അടിച്ചിരുന്നു. ഇവരാണോ ആക്രമണത്തിനു പിന്നിലെന്ന് അന്വേഷിക്കുന്നതായി പൊലീസ് പറഞ്ഞു.
കുത്തേറ്റ ഉടനെ അബോധാവസ്ഥയിലായ മാത്യുവിനെ മെഡിക്കൽ കോളജിൽ ശസ്ത്രക്രിയയ്ക്കു വിധേയനാക്കി. തിങ്കളാഴ്ച രാത്രിയാണ് സംഭവം .സുഹൃത്തിന്റെ കുട്ടിയുടെ ആദ്യ കുർബാന ചടങ്ങിൽ പങ്കെടുത്ത ശേഷം മടങ്ങുമ്പോൾ വീടിനു സമീപം ചാമക്കാലാ റോഡിൽ വച്ചാണ് ആക്രമണം. ബഹളം കേട്ട് വീട്ടിൽ നിന്നും പുറത്തിറങ്ങിയ തങ്കച്ചന്റെ ഭാര്യ ഷെല്ലിയുടെ മുന്നിലായിരുന്നു അക്രമം.തങ്കച്ചന്റെയും ഭാര്യയുടെയും നിലവിളി കേട്ട് നാട്ടുകാർ എത്തിയതോടെ അക്രമി സംഘം രക്ഷപ്പെട്ടു. കടുത്തുരുത്തി എസ്എച്ച്ഒ രഞ്ജിത്ത് വിശ്വനാഥ്. എസ്ഐ ബിബിൻ ചന്ദ്രൻ എന്നിവരുടെ നേതൃത്വത്തിൽ പൊലീസെത്തി.
