കൊച്ചി : നടിയെ പീഡിപ്പിച്ച കേസിലെ അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയെന്ന കേസില് നടന് ദിലീപ് അടക്കമുള്ളവര്ക്ക് ഹൈക്കോടതി മുന്കൂര് ജാമ്യം അനുവദിച്ചത് കര്ശന ഉപാധികളോടെ. അന്വേഷണവുമായി സഹകരിക്കണമെന്ന് ദിലീപിനു കര്ശന നിര്ദേശം നല്കിയ കോടതി, അന്വേഷണവുമായി സഹകരിക്കാത്തപക്ഷം പ്രോസിക്യൂഷന് അറസ്റ്റ് നടപടികള്ക്കു വേണ്ടി കോടതിയെ സമീപിക്കാമെന്നു വ്യക്തമാക്കി. പ്രതികള് പാസ്പോര്ട്ട് കോടതിയില് സമര്പ്പിക്കണം. സാക്ഷികളെ സ്വാധീനിക്കാന് പാടില്ല. പ്രതികള് ഒരുലക്ഷം രൂപയുടെ രണ്ട് ആള് ജാമ്യം എടുക്കണമെന്നും കോടതി നിര്ദേശിച്ചു. ദിലീപിനെക്കൂടാതെ, സഹോദരന് അനൂപ്, സഹോദരി ഭര്ത്താവ് ടി.എന്.സുരാജ്, ബന്ധുവായ അപ്പു, സുഹൃത്തായ ബൈജു ചെങ്ങമനാട്, ശരത്ത് എന്നിവര്ക്കാണ് ജസ്റ്റിസ് പി.ഗോപിനാഥിന്റെ സിംഗിള് ബെഞ്ച് ഉപാധികളോടെ ജാമ്യം അനുവദിച്ചത്.
ബാലചന്ദ്രകുമാറിന്റെ മൊഴിയെ തുടര്ന്നു ക്രൈംബ്രാഞ്ച് റജിസ്റ്റര് ചെയ്ത കേസില് കഴിഞ്ഞ മാസം പത്തിനാണു ദിലീപ് അടക്കമുള്ളവര് മുന്കൂര് ജാമ്യാപേക്ഷ നല്കിയത്. അന്വേഷണ ഉദ്യോഗസ്ഥനായ ക്രൈംബ്രാഞ്ച് ഡിവൈഎസ്പി ബൈജു പൗലോസ്, കേസില് ദിലീപിനെ അറസ്റ്റ് ചെയ്ത സംഘത്തിലുണ്ടായിരുന്ന ഡിവൈഎസ്പി കെ.എസ്.സുദര്ശന് എന്നിവരടക്കമുള്ളവരെ അപായപ്പെടുത്താന് ദിലീപും കൂട്ടാളികളും ഗൂഢാലോചന നടത്തിയതിനു ദൃക്സാക്ഷിയാണെന്നായിരുന്നു ബാലചന്ദ്രകുമാറിന്റെ മൊഴി. സംഭാഷണങ്ങളുടെ റിക്കോര്ഡ് ചെയ്ത ശബ്ദരേഖയും ബാലചന്ദ്രകുമാര് കൈമാറിയിരുന്നു.
