മലപ്പുറം : പൂക്കോട്ടുംപാടത്ത് ജനവാസ മേഖലയിൽ വീണ്ടും കരടി എത്തി. ടി.കെ കോളനിയിലാണ് ഭീതി പരത്തി വീണ്ടും കരടി എത്തിയത്. നേരത്തെ രാത്രി കാലങ്ങളിലായിരുന്നു കരടി എത്തിയിരുന്നതെങ്കിൽ ഇപ്പോൾ പകലും കരടിയെത്തിയതോടെ പ്രദേശവാസികൾ ഭീതിയിലാണ്. രാത്രി പ്രദേശത്ത് എത്തുന്ന കരടി സമീപത്തെ ക്ഷേത്രങ്ങളിലെ പൂജാസാധനങ്ങളും എണ്ണയുമെല്ലാം ഭക്ഷിച്ച് മടങ്ങിയിരുന്നു. ആർആർടി സംഘങ്ങൾ നടത്തിയ തിരച്ചിലിലും കരടിയെ കണ്ടിരുന്നു. എന്നാൽ പിടികൂടാനായില്ല. പകൽസമയത്ത് കരടിയിറങ്ങുന്നത് കുട്ടികളടക്കമുള്ളവർക്ക് ഭീഷണിയാണെന്നും എത്രയും പെട്ടന്ന് കൂടുവെച്ച് കരടിയെ പിടികൂടണമെന്നുമാണ് നാട്ടുകാരുടെ ആവശ്യം.
