കൊച്ചി: അധ്യാപകനും എഴുത്തുകാരനുമായ ഡോ. സി ആര് ഓമനക്കുട്ടന് (80) അന്തരിച്ചു. ഹൃദയാഘാതത്തെ തുടര്ന്ന് കൊച്ചിയിലെ സ്വകാര്യ ആശുപത്രിയില് വച്ചാണ് അന്ത്യം. 23 വര്ഷം എറണാകുളം മഹാരാജാസ് കോളേജില് അധ്യാപകനായി പ്രവര്ത്തിച്ചിട്ടുള്ള സി ആര് ഓമനക്കുട്ടന് ഹാ്യസാഹിത്യത്തിനുള്ള 2010 ലെ കേരള സാഹിത്യ അക്കാദമി പുരസ്കാരം നേടിയ എഴുത്തുകാരനാണ്. ശ്രീഭൂതനാഥവിലാസം നായര് ഹോട്ടല് എന്ന ഹാസ്യ സാഹിത്യകൃതിക്കായിരുന്നു പുരസ്കാരം. ഇരുപത്തഞ്ചിലേറെ പുസ്തകങ്ങളും നൂറ്റമ്പതിലേറെ കഥകളും എഴുതിയിട്ടുള്ള സി ആര് ഓമനക്കുട്ടന്റെ അടിയന്തരാവസ്ഥക്കാലത്തെ കുറിച്ച് എഴുതിയ ‘ശവം തീനികള്’ വലിയ ചര്ച്ചയായിരുന്നു. ദേശാഭിമാനി പത്രം പ്രസിദ്ധീകരിച്ച രാഷ്ട്രീയ-സാമൂഹിക പഠന വിഭാഗത്തില്പ്പെട്ട പരമ്പര പോലീസ് മര്ദനത്തില് കൊല്ലപ്പെട്ട രാജനെക്കുറിച്ചായിരുന്നു പരമ്പര. കാരൂര്, കോട്ടയം ഭാസി, അഡ്വ. എം എന് ഗോവിന്ദന്നായര്, ആര്ട്ടിസ്റ്റ് ശങ്കരന്കുട്ടി എന്നിവരുമായി അടുത്ത ബന്ധമുണ്ടായിരുന്ന സിആര് എലിസബത്ത് ടെയ്ലര്, മിസ് കുമാരി എന്നിവരുടെ ജീവിതകഥകളും എഴുതിയിട്ടുണ്ട്.
പെണ്ണമ്മയും രാഘവന് ദമ്പതികളുടെ മകനായി കോട്ടയം തിരുനക്കരയില് 1943 ലായിരുന്നു സിആര് ഓമനക്കുട്ടന്റെ ജനനം. കോട്ടയം നായര്സമാജം ഹൈസ്കൂള്, സിഎംഎസ്. കോളജ്, കൊല്ലം എസ്എന് കോളജ്, ചങ്ങനാശേരി എസ്ബി കോളജ് എന്നിവിടങ്ങളില് വിദ്യാഭ്യാസം പൂര്ത്തിയാക്കിയ അദ്ദേഹം പത്രപ്രവര്ത്തന, അധ്യാപന മേഖലകളില് പ്രവര്ത്തിച്ചിട്ടുണ്ട്. കേരള സര്ക്കാരിന്റെ പബ്ളിക് റിലേഷന്സ് വകുപ്പില് ജോലി നോക്കിയ ശേഷമായിരുന്നു ഗവണ്മെന്റ് കോളജുകളില് മലയാളം അധ്യാപകനായി എത്തുന്നത്. സംവിധായകന് അമല് നീരദ് മകനാണ്.