യുക്രൈൻ : ചെർണോബിൽ ആണവനിലയത്തിൽ നിന്ന് പുറപ്പെടുന്ന ഉയർന്ന തോതിലുള്ള റേഡിയേഷൻ കാരണമാണ് റഷ്യൻ സൈന്യം അവിടെനിന്ന് സ്ഥലം വിട്ടതെന്ന് യുക്രൈൻ. യുക്രേനിയൻ സ്റ്റേറ്റ് പവർ കമ്പനിയായ എനെർഗോട്ടോം ആണ് ഇത്തരത്തിൽ ഒരു ആരോപണം ഉന്നയിച്ചത്. കമ്പനിയുടെ ആരോപണം യുഎൻ ന്യൂക്ലിയർ വാച്ച്ഡോഗ് അന്വേഷിക്കുന്നുണ്ട്.
ആണവനിലയത്തിനരികിലെ വനത്തിൽ റഷ്യൻ സൈന്യം കിടങ്ങ് കുഴിച്ചെന്ന് എനെർഗോട്ടോം ആരോപിച്ചതായി ഗാർഡിയൻ റിപ്പോർട്ട് ചെയ്യുന്നു. റേഡിയേഷൻ ഏറ്റതിനാൽ സൈനികർ പേടിച്ചെന്നും അവർ വേഗം അവിടെനിന്ന് മടങ്ങിയെന്നും റിപ്പോർട്ടിലുണ്ട്. റേഡിയേഷൻ ഏറ്റ റഷ്യൻ സൈനികരെ ബലാറസിലെ പ്രത്യേക ആശുപത്രിയിലേക്ക് മാറ്റിയെന്നും മറ്റ് ചില റിപ്പോർട്ടുകൾ സൂചിപ്പിക്കുന്നു. ആണവനിലയത്തിനരികിലൂടെ ടാങ്ക് ഓടിച്ച ഇവർക്ക് റേഡിയേഷൻ ഏറ്റു എന്നാണ് റിപ്പോർട്ട്.
യുക്രേനിയൻ ഉപ പ്രധാനമന്ത്രി ഇറിന വെരെഷ്ചുകും ഇതേ ആരോപണം ഉന്നയിച്ചു. റഷ്യക്കാർക്ക് റേഡിയേഷൻ ഏറ്റു എന്ന് അവർ പറഞ്ഞു. അതേസമയം റഷ്യൻ വിദേശകാര്യമന്ത്രി പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്താൻ മണിക്കൂറുകൾ മാത്രം ബാക്കിനിൽക്കെ ഈ നീക്കങ്ങളെ ശക്തമായി അപലപിച്ച് അമേരിക്ക രംഗത്തെത്തി. കുറഞ്ഞ നിരക്കിൽ റഷ്യയിൽ നിന്ന് ക്രൂഡ് ഓയിൽ വാങ്ങാനുള്ള നീക്കം വളരെ നിരാശാജനകമാണെന്ന് യു എസ് കമ്മ്യൂണിക്കേഷൻ സെക്രട്ടറി പ്രസ്താവിച്ചു. റഷ്യയ്ക്കുമേൽ അമേരിക്ക ഉൾപ്പെടെയുള്ള രാജ്യങ്ങൾ ഉപരോധം കടുപ്പിക്കുന്ന പശ്ചാത്തലത്തിലാണ് കമ്മ്യൂണിക്കേഷൻ സെക്രട്ടറിയുടെ പ്രസ്താവന. ഉപരോധത്തിനിടെ റഷ്യയെ സഹായിക്കുന്ന രാജ്യങ്ങളും പ്രത്യാഘാതങ്ങൾ നേരിടുമെന്ന് അമേരിക്ക മുൻപ് മുന്നറിയിപ്പ് നൽകിയിരുന്നു.
