തിരുവനന്തപുരം: മുഖ്യമന്ത്രി പിണറായി വിജയനെതിരെ വിമാനത്തിൽ പ്രതിഷേധിച്ച യൂത്ത് കോൺഗ്രസ് പ്രവർത്തകരെ എൽഡിഎഫ് കണ്‍വീനർ ഇ.പി.ജയരാജൻ തള്ളിയിട്ടതിൽ പ്രതിഷേധിച്ച് കോൺഗ്രസ്. മുഖ്യമന്ത്രിക്കെതിരെ മുദ്രാവാക്യം വിളിച്ചാൽ അവരെ എൽഡിഎഫ് കണ‍വീനർ തല്ലുമോ എന്ന് യൂത്ത് കോണ്‍ഗ്രസ് സംസ്ഥാന ജനറൽ സെക്രട്ടറി രാഹുൽ മാങ്കൂട്ടത്തിൽ സമൂഹമാധ്യമത്തിലെ കുറിപ്പിൽ ചോദിച്ചു. വിമാനത്തിൽ മുദ്രാവാക്യം വിളിച്ച യൂത്ത് കോൺഗ്രസ് പ്രവർത്തകർ മദ്യപിച്ചിരുന്നു എന്ന് തെളിയിക്കാൻ ഇ.പി.ജയരാജനെ വെല്ലുവിളിക്കുന്നുവെന്ന് ഷാഫി പറമ്പിൽ എംഎൽഎ പറഞ്ഞു.
ഷാഫി പറമ്പിലിന്റെ ഫെയ്സ്ബുക് പോസ്റ്റ്:
വിമാനത്തിൽ മുദ്രാവാക്യം വിളിച്ച യൂത്ത് കോൺഗ്രസ് പ്രവർത്തകർ മദ്യപിച്ചിരുന്നു എന്നു തെളിയിക്കാൻ ഇ.പി.ജയരാജനെ വെല്ലുവിളിക്കുന്നു.
തിരുവനന്തപുരം മെഡിക്കൽ കോളജിൽ പോയി അവരുടെ മെഡിക്കൽ പരിശോധന നടത്തട്ടെ. വിമാനത്തിൽ മുദ്രാവാക്യം വിളിച്ചതിന് കേസുണ്ടെങ്കിൽ അവരെ അക്രമിച്ച ജയരാജനെതിരെയും കേസെടുക്കണം. ഒരു മുഖ്യമന്ത്രിയുടെ നെഞ്ചിലും നെറ്റിയിലും കല്ലെറിഞ്ഞ് പരിക്കേൽപ്പിച്ചവരാണ് മുദ്രാവാക്യം വിളിച്ചവരെ ഭീകരവാദികളോട് ഉപമിക്കുന്നത്.
