ഭോപാൽ : പ്രായപൂർത്തിയാകാത്ത പെൺകുട്ടിയെ വീട്ടിൽ കയറി പീഡിപ്പിക്കുകയും സ്വകാര്യ ചിത്രങ്ങൾ പ്രചരിപ്പിക്കുകയും ചെയ്ത യുവാവിനെതിരേ പോലീസ് കേസെടുത്തു. മധ്യപ്രദേശിലെ ഭോപാലിന് സമീപമുള്ള ഗ്രാമത്തിൽ താമസിക്കുന്ന 26കാരനെതിരെയാണ് പെൺകുട്ടിയുടെ പിതാവിന്റെ പരാതിയിൽ കേസെടുത്തത്. പ്രതി നിലവിൽ ഒളിവിലാണെന്നും ഇയാൾക്കുവേണ്ടി തെരച്ചിൽ തുടരുകയാണെന്നും പോലീസ് പറഞ്ഞു. പ്ലസ് വൺ വിദ്യാർഥിനിയായ 17കാരിയെയാണ് യുവാവ് ലൈംഗികമായി പീഡിപ്പിക്കുകയും ചിത്രങ്ങൾ പകർത്തി ഭീഷണിപ്പെടുത്തുകയും ചെയ്തത്. എന്നാൽ പെൺകുട്ടി യുവാവിന്റെ ഭീഷണിക്ക് വഴങ്ങിയില്ല. ഇതോടെയാണ് പ്രതി പെൺകുട്ടിയുടെ സ്വകാര്യചിത്രങ്ങൾ സാമൂഹികമാധ്യമങ്ങളിൽ പ്രചരിപ്പിച്ചത്. ഈ ചിത്രങ്ങൾ കണ്ട ഗ്രാമവാസിയാണ് കുട്ടിയുടെ പിതാവിനെ അറിയിച്ചത്. തുടർന്ന് പിതാവ് തന്നെ പോലീസ് സ്റ്റേഷനിലെത്തി പരാതി നൽകുകയായിരുന്നു.
ഗ്രാമത്തിലെ കുടുംബങ്ങളെല്ലാം ചേർന്ന് നടത്തിയ ഒരു യാത്രയ്ക്കിടെയാണ് പെൺകുട്ടിയെ യുവാവ് പരിചയപ്പെടുന്നത്. പിന്നീട് പെൺകുട്ടിയുടെ വീട്ടിൽ അതിക്രമിച്ച് കയറിയ യുവാവ് കുട്ടിയെ പീഡിപ്പിക്കുകയായിരുന്നു. കഴിഞ്ഞവർഷം ഏപ്രിൽ 16-നായിരുന്നു സംഭവം. പെൺകുട്ടിയുടെ നഗ്നചിത്രങ്ങളും ഇയാൾ മൊബൈലിൽ പകർത്തി. ഈ ചിത്രങ്ങൾ പ്രചരിപ്പിക്കുമെന്ന് ഭീഷണിപ്പെടുത്തി വീണ്ടും പീഡിപ്പിക്കാൻ ശ്രമിച്ചു. എന്നാൽ പെൺകുട്ടി യുവാവിന്റെ നമ്പർ ബ്ലോക്ക് ചെയ്യുകയും യുവാവിനെ കാണാൻ വിസമ്മതിക്കുകയും ചെയ്തു. ഇതിനുപിന്നാലെയാണ് പെൺകുട്ടിയെ അപകീർത്തിപ്പെടുത്താനായി നഗ്നചിത്രങ്ങൾ സാമൂഹികമാധ്യമങ്ങളിൽ പ്രചരിപ്പിച്ചതെന്നും പോലീസ് പറഞ്ഞു. പ്രതിയെ ഉടൻ പിടികൂടുമെന്നും ഊർജിതമായ തെരച്ചിൽ നടക്കുകയാണെന്നും പോലീസ് പറഞ്ഞു.
