ദില്ലി: രാജ്യത്ത് കോവിഡ് കേസുകള് കുതിച്ചുയരുന്നു. കഴിഞ്ഞ 24 മണിക്കൂറിനുള്ളില് 5,676 പുതിയ കോവിഡ് കേസുകള് റിപ്പോര്ട്ട് ചെയ്തതായി കേന്ദ്ര ആരോഗ്യ മന്ത്രാലയം അറിയിച്ചു. സജീവ കേസുകള് 37,093 ആയി ഉയര്ന്നു. 21 മരണങ്ങളോടെ മരണസംഖ്യ 5,31,000 ആയി ഉയര്ന്നു. പ്രതിദിന പോസിറ്റിവിറ്റി നിരക്ക് 2.88% വും പ്രതിവാര പോസിറ്റിവിറ്റി നിരക്ക് 3.81% ആയി. രാജ്യത്തുടനീളം കൊവിഡ്-19 കേസുകള് വര്ധിക്കുന്ന സാഹചര്യത്തില്, പല സംസ്ഥാനങ്ങളും മാസ്ക് ധരിക്കുന്നത് നിര്ബന്ധമാക്കിയിട്ടുണ്ട്.
ഡല്ഹി, പഞ്ചാബ്, രാജസ്ഥാന് എന്നിവിടങ്ങളില് നിന്ന് മൂന്ന് വീതം മരണങ്ങളും കര്ണാടകയില് രണ്ട് പേരും ഗുജറാത്ത്, ഹരിയാന, മഹാരാഷ്ട്ര, തമിഴ്നാട് എന്നിവിടങ്ങളില് ഒന്ന് വീതവും റിപ്പോര്ട്ട് ചെയ്യപ്പെട്ടു. ചണ്ഡിഗഢിലും മാസ്ക് ധരിക്കുന്നതുള്പ്പെടെയുളള കോവിഡ് മുന്നറിയിപ്പുകള് പൊതുജനങ്ങള്ക്ക് നല്കിയിട്ടുണ്ട്. ഡല്ഹിയില്, പനി ഉള്പ്പെടെയുളള ലക്ഷണങ്ങളുള്ളവരോട് മാസ്ക് ധരിക്കാനും പൊതുസ്ഥലങ്ങളിലെ സന്ദര്ശനം ഒഴിവാക്കാനും ആരോഗ്യമന്ത്രി സൗരഭ് ഭരദ്വാജ് ആവശ്യപ്പെട്ടിട്ടുണ്ട്. മുംബൈയിലെ എല്ലാ സിവില് ഹോസ്പിറ്റലുകളിലും ജീവനക്കാര്ക്കും രോഗികള്ക്കും സന്ദര്ശകര്ക്കും മാസ്ക് നിര്ബന്ധമാക്കിയതായി ബ്രിഹന്മുംബൈ മുനിസിപ്പല് കോര്പ്പറേഷന് അറിയിച്ചു.
