കോഴിക്കോട്∙ കണ്ണൂരിലെ റിസോർട്ടിന്റെ മറവിൽ ഇ.പി.ജയരാജൻ അനധികൃത സ്വത്ത് സമ്പാദനം നടത്തിയെന്ന ആരോപണം കേവലം ഉൾപാർട്ടി പ്രശ്നമായി കാണാനാവില്ലെന്ന് കെ.മുരളീധരൻ എംപി. ജയരാജൻ മന്ത്രിയായിരുന്നപ്പോൾ നടന്ന കാര്യങ്ങളെക്കുറിച്ചാണ് ആരോപണം ഉയർന്നിരിക്കുന്നത്. റിസോർട്ടിനായി മന്ത്രിസ്ഥാനം ഇ.പി.ജയരാജൻ ദുരുപയോഗം ചെയ്തു. ഇതേവരെ ഈ ആരോപണങ്ങൾ ഇ.പി നിഷേധിച്ചിട്ടില്ല. ഗുരുതരമായ വിഷയം പാർട്ടിയല്ല പരിശോധിക്കേണ്ടത്. ജുഡീഷ്യൽ അന്വേഷണമാണ് വേണ്ടതെന്നും കെ.മുരളീധരൻ പറഞ്ഞു. ഭരണത്തുടർച്ച അണികളെ വഷളാക്കിയെന്ന കാര്യം മാ‍ർക്സിസ്റ്റ് പാർട്ടി സമ്മതിച്ചെന്നും അദ്ദേഹം പറഞ്ഞു.
പി.ജയരാജനെതിരായ കള്ളക്കടത്ത് ആരോപണം അദ്ദേഹത്തിന്റെ പാർട്ടി അന്വേഷിക്കട്ടെ. അധികാര ദുർവിനിയോഗമാണ് ഇ.പിയുടെ കാര്യത്തിൽ നടന്നത്. അതിൽ ജുഡീഷ്യൽ അന്വേഷണം നടത്തണം. ബഫർസോൺ വിഷയത്തിൽ സംസ്ഥാനത്തിനു തെറ്റു പറ്റിയിട്ടുണ്ട്. അത് അംഗീകരിക്കണമെന്നും മുരളീധരൻ പറഞ്ഞു. കെപിസിസി പുനഃസംഘടന എത്രയും പെട്ടെന്ന് നടക്കും. പുനഃസംഘടന വൈകുന്നതു പ്രയാസം ഉണ്ടാക്കുകയും പാ‍ർട്ടിക്കു ദോഷമുണ്ടാക്കുകയും ചെയ്യുമെന്നും കെ.മുരളീധരൻ പറഞ്ഞു.
