ബെംഗളൂരു ∙ പുതിയ മേക്കപ്പ് പരീക്ഷിച്ചതിനെ തുടർന്ന് വധുവിന്റെ മുഖം പൊള്ളിയതിനു പിന്നാലെ വിവാഹത്തില്നിന്നു പിന്മാറി വരന്. കർണാടകയിലെ ഹസൻ ജില്ലയിലെ അസരിഗിരയിലാണ് സംഭവം. അസരിഗിര സ്വദേശിയായ യുവതിയുടെ വിവാഹമാണ് മുടങ്ങിയത്. വിവാഹ മേക്കോവറിന് ബ്യൂട്ടിപാർലറിൽ പോയ പെണ്കുട്ടിയോട് പുത്തൻ മേക്കപ്പ് പരീക്ഷിക്കാമെന്ന് ബ്യൂട്ടിപാർലർ ഉടമ പറഞ്ഞു. ഫൗണ്ടേഷൻ ഇട്ടതിനു പിന്നാലെ ആവി കൊള്ളിച്ചതോടെ മുഖം പൊള്ളുകയും വീർക്കുകയും ചെയ്തു. വധുവിന്റെ മുഖം പൊള്ളിയതോടെ വരൻ വിവാഹത്തിൽനിന്ന് പിന്മാറി. മുഖത്ത് പൊള്ളലേറ്റ യുവതിയെ ആശുപത്രിയിൽ പ്രവേശിപ്പിച്ചു. ബ്യൂട്ടിപാർലറിനെതിരെ യുവതിയുടെ കുടുംബം പരാതി നൽകി.
