തിരവനന്തപുരം> കേരള പിറവി ദിനമായ നവംബര് ഒന്ന് മുതല് ഒരാഴ്ച സമസ്തമേഖലകളിലും കേരളത്തിന്റെ മുന്നേറ്റം വ്യക്തമാക്കുന്ന ‘കേരളീയം 2023’ സംഘടിപ്പിക്കുമെന്ന് മുഖ്യമന്ത്രി പിണറായി വിജയന്. തിരുവനന്തപുരം നഗരത്തില് കവടിയാര് മുതല് കിഴക്കേകോട്ട വരെ കേരളീയവുമായി ബന്ധപ്പെട്ട പരിപാടികള് അരങ്ങേറും. വിവിധ മേഖലകളില് കേരളം കൈവരിച്ച നേട്ടങ്ങള് അവതരിപ്പിക്കുന്നതോടൊപ്പം ഭാവി കേരളത്തിലുള്ള മാര്ഗ്ഗരേഖ തയ്യാറാക്കലും ആണ് കേരളീയത്തിലൂടെ ലക്ഷ്യമിടുന്നത്. ലോകത്തിലെ തന്നെ പ്രഗത്ഭരും പ്രധാനികളുമായ വിദഗ്ദധരെ ഉള്പ്പെടുത്തി 25 സെമിനാറുകള് പത്തോളം പ്രദര്ശനങ്ങളുംസംഘടിപ്പിക്കും. തലസ്ഥാന നഗരമാകെ പ്രദര്ശന വേദിയാകുന്ന രീതിയിലാണ് പരിപാടി. നിയമസഭയില് പുസ്തകോത്സവം കേരളീയത്തിന്റെ ഭാഗമായി ഉണ്ടാകുമെന്നും മുഖ്യമന്ത്രി വാർത്താസമ്മേളനത്തിൽ പറഞ്ഞു.
കേരളീയം സംഘാടകസമിതി ഓഫിസ് ഉദ്ഘാടനം വ്യാഴാഴ്ച
‘കേരളീയം 2023’ ന്റെ സംഘാടകസമിതി ഓഫിസ് വ്യാഴം വൈകിട്ട് അഞ്ചിനു കനകക്കുന്നിൽ മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. കേരളീയം ലോഗോയുടെ പ്രകാശനവും വെബ്സൈറ്റ് ഉദ്ഘാടനവും മുഖ്യമന്ത്രി നിർവഹിക്കും.
