കൊച്ചി: ഇന്ത്യൻ വ്യോമയാനരംഗത്ത് കോവിഡ് അനന്തര കാലഘട്ടത്തിൽ വികസനത്തിന്റെ പുതിയ പാതകൾ തുറന്ന കൊച്ചി അന്താരാഷ്ട്ര വിമാനത്താവള കമ്പനി (സിയാൽ) 25 വർഷത്തിനിടയിലെ ഏറ്റവും ഉയർന്ന ലാഭം നേടി. 2022–-23ൽ 521.50 കോടി രൂപ പ്രവർത്തനലാഭവും 267.17 കോടി രൂപ അറ്റാദായവും നേടി. നിക്ഷേപകർക്ക് 35 ശതമാനം റെക്കോഡ് ലാഭവിഹിതം നൽകാനും മുഖ്യമന്ത്രി പിണറായി വിജയന്റെ അധ്യക്ഷതയിൽ തിങ്കളാഴ്ച ചേർന്ന സിയാൽ ഡയറക്ടർബോർഡ് യോഗം ശുപാർശ ചെയ്തു.
കോവിഡിന്റെ പ്രത്യാഘാതത്തിൽ 2020-–-21-ൽ 85.10 കോടി രൂപ നഷ്ടം സിയാലിന് നേരിട്ടിരുന്നു. കോവിഡ് അനന്തരം നടപ്പാക്കിയ സാമ്പത്തിക, പ്രവർത്തന പുനഃക്രമീകരണ നടപടികളുടെ ഫലമായി 2021––22-ൽ 22.45 കോടി രൂപ ലാഭം നേടി. കോവിഡ് അനന്തര വർഷത്തിൽ ലാഭം നേടിയ ഇന്ത്യയിലെ ഏക വിമാനത്താവളമായിരുന്നു സിയാൽ.
പുതിയ വരുമാനമാർഗങ്ങൾ കണ്ടെത്താനുള്ള ശ്രമങ്ങൾ ലക്ഷ്യംകണ്ടതോടെ 2021-–-22-ൽ കമ്പനിയുടെ മൊത്തവരുമാനം 418.69 കോടിയായി. 2022––23-ൽ മൊത്തവരുമാനം 770.90 കോടിയായും ഉയർന്നു. തേയ്മാനച്ചെലവ്, നികുതി, പലിശ തുടങ്ങിയവ ഉൾപ്പെടെ സിയാൽ നേടിയ പ്രവർത്തനലാഭം 521.50 കോടിയാണ്. ഇവയെല്ലാം കിഴിച്ചുള്ള അറ്റാദായം 267.17 കോടിയും.
കഴിഞ്ഞ സാമ്പത്തികവർഷം സിയാലിലെ യാത്രക്കാരുടെ എണ്ണം 89.29 ലക്ഷമാണ്. 61,232 വിമാനസർവീസുകളും കൈകാര്യം ചെയ്തു. സിയാലിന്റെ നൂറുശതമാനം ഓഹരിയുള്ള ഉപകമ്പനികളുടെ സാമ്പത്തികപ്രകടനവും മെച്ചപ്പെട്ടു. മുഖ്യമന്ത്രിയെ കൂടാതെ, മന്ത്രിമാരും ഡയറക്ടർമാരുമായ പി രാജീവ്, കെ രാജൻ, ഡയറക്ടർമാരായ ചീഫ് സെക്രട്ടറി വി പി ജോയി, ഇ കെ ഭരത്ഭൂഷൻ, എം എ യൂസഫ് അലി, ഇ എം ബാബു, എൻ വി ജോർജ്, പി മുഹമ്മദലി, മാനേജിങ് ഡയറക്ടർ എസ് സുഹാസ്, കമ്പനി സെക്രട്ടറി സജി കെ ജോർജ് എന്നിവർ യോഗത്തിൽ പങ്കെടുത്തു.
മൂന്നാം ടെർമിനൽ വികസിപ്പിക്കും , പുതിയ കാർഗോ ടെർമിനലും
രജതജൂബിലി വർഷത്തിൽ സിയാൽ ഗ്രൂപ്പ് കമ്പനികളുടെ മൊത്തവരുമാനം ആയിരം കോടിയാക്കി ഉയർത്താനുള്ള പദ്ധതികൾക്കും ഡയറക്ടർബോർഡ് യോഗം രൂപംനൽകി. സെപ്തംബറിൽ അഞ്ച് മെഗാ പദ്ധതികൾക്കും തുടക്കമിടും. മൂന്നാം ടെർമിനൽ വികസനത്തിനായുള്ള നിർമാണപ്രവർത്തനത്തിന് കല്ലിടൽ, പുതിയ കാർഗോ ടെർമിനൽ ഉദ്ഘാടനം, ഗോൾഫ് ടൂറിസം പദ്ധതി, രണ്ടാം ടെർമിനലി-ൽ ട്രാൻസിറ്റ് അക്കോമഡേഷൻ നിർമാണോദ്ഘാടനം, മൂന്നാം ടെർമിനലിന്റെ മുൻഭാഗത്ത് കൊമേഴ്സ്യൽ സോൺ നിർമാണോദ്ഘാടനം എന്നിവയാണ് സെപ്തംബറിൽ നിശ്ചയിച്ചിട്ടുള്ളത്. മൂന്നാം ടെർമിനൽ വികസനത്തിനുമാത്രം 500 കോടിയിലേറെ രൂപ കണക്കാക്കുന്നു.
