തിരുവനന്തപുരം : കെപിസിസി ട്രഷറർ ആയിരുന്ന അഡ്വ. വി പ്രതാപചന്ദ്രന്റെ മരണം കോൺഗ്രസിലെ ചിലരുടെ മാനസിക പീഡനത്തെ തുടർന്നാണെന്ന് കുടുംബം. കെപിസിസി അധ്യക്ഷൻ കെ സുധാകരൻ നേരിട്ട്‌ നിയമിച്ച സിയുസി സംഘത്തിലുള്ള പ്രമോദ്, രമേശൻ എന്നിവർ അപവാദം പ്രചരിപ്പിച്ച്‌ നിരന്തരം പീഡിപ്പിച്ചതെന്നും ഇത് മരണത്തിലേക്ക്‌ നയിച്ചെന്നും ചൂണ്ടിക്കാട്ടി ഡിജിപിക്ക് പരാതി നൽകി. മക്കളായ പ്രജിത്ത്, പ്രീതി എന്നിവരാണ് പരാതി നൽകിയത്.
പരാതിയുടെ പകർപ്പ് പ്രതിപക്ഷ നേതാവ്‌ വി ഡി സതീശനും കെ സുധാകരനും നൽകി. കെപിസിസി യുടെ ഫണ്ട് കട്ടുമുടിക്കുന്നു എന്ന തരത്തിൽ ചില മാധ്യമങ്ങളിലും സോഷ്യൽ മീഡിയയിലും പ്രചരിച്ച വാർത്ത പ്രതാപ ചന്ദ്രന് അപകീർത്തിയും മാനസിക ആഘാതവും ഉണ്ടാക്കി. അപവാദ പ്രചാരണത്തിന് ചുക്കാൻ പിടിച്ചത്‌ സിയിസി ക്കാരാണ്‌. കോഴിക്കോട് സ്വദേശികളായ പ്രമോദ്, രമേശൻ എന്നിവർക്കെതിരെ പോലീസിൽ പരാതി നൽകാൻ പ്രതാപചന്ദ്രൻ തീരുമാനിച്ചിരുന്നു.
വക്കീലിനെ ചുമതലപ്പെടുത്തി, കെ സുധാകരനേയും അറിയിച്ചു. ഇക്കാര്യങ്ങളെല്ലാം മരിക്കുന്നതിനു മുമ്പ്‌ മക്കളോട്‌ പ്രതാപചന്ദ്രൻ പറയുകയും ചെയ്‌തു. പരാതികൊടുക്കുന്നതിനുമുമ്പേ മരണം സംഭവിച്ചു. ഓഫീസിൽ വച്ച്‌ പ്രമോദ് നിരന്തരം ആക്ഷേപിച്ചു, ഇത് പ്രതാപചന്ദ്രനെ അസ്വസ്ഥനാക്കിയിരുന്നു. മരണത്തിന് കാരണക്കാരനായവർക്കെതിരെ നിയമ നടപടി സ്വീകരിക്കണമെന്നും പരാതിയിൽ ആവശ്യപ്പെട്ടു. ട്രഷറർ എന്ന നിലയിൽ ഏറെക്കാലം പ്രവർത്തിച്ച പ്രതാപചന്ദ്രൻ കോൺഗ്രസ് പ്രവർത്തകർക്കിടയിൽ ജനകീയനായിരുന്നു. മുൻമന്ത്രിയും കെപിസിസി അധ്യക്ഷനുമായിരുന്ന എസ് വരദരാജൻ നായരുടെ മകനാണ്. ഡിസംബർ 20 നായിരുന്നു അന്ത്യം.
