കൊച്ചി : ആള്ക്കൂട്ടാക്രമണത്തിനിരയായി അട്ടപ്പാടിയില് ആദിവാസി യുവാവ് മധു കൊല്ലപ്പെട്ട കേസില് നിലപാട് വ്യക്തമാക്കി സ്പെഷല് പ്രോസിക്യൂട്ടര്. സിസിടിവി ദൃശ്യങ്ങള് അടക്കമുളള ഡിജിറ്റല് തെളിവുകള് പ്രതികള്ക്ക് കൈമാറാന് പോലീസ് കാലതാമസം വരുത്തിയതാണ് വിചാരണ വൈകാന് കാരണമെന്ന് അഡ്വ. വി ടി രഘുനാഥ് പറഞ്ഞു. തനിക്കെതിരെ സംശയമുയര്ന്ന സാഹചര്യത്തില് സ്പെഷല് പ്രോസിക്യൂട്ടറായി തുടരുന്നതില് താല്പര്യക്കുറവുണ്ടെന്നും അദ്ദേഹം പറഞ്ഞു . മധുവിന്റെ കൊലപാതകത്തിലെ സ്പെഷല് പ്രോസിക്യൂട്ടര് എവിടേയെന്ന് മണ്ണാര്ക്കാട് കോടതി ചോദിച്ചത് വിവാദമായ പശ്ചാത്തലത്തിലാണ് മുന് എറണാകുളം സിജെഎം കൂടിയായ വിടി രഘുനാഥ് നയം വ്യക്തമാക്കുന്നത്. പ്രതികള് ആവശ്യപ്പെട്ട രേഖകള് പോലീസ് കൈമാറാതെ വിസ്താര നടപടികള് തുടങ്ങാന് കഴിയില്ല. ആദ്യ കുറ്റപത്രത്തില് പഴുതുകള് ഉണ്ടായിരുന്നു.
കേസില് സിബിഐ അന്വേഷണം വേണമെന്ന മധുവിന്റെ കുടുംബത്തിന്റെ ആവശ്യം യുക്തിസഹമാണ്. ഔദ്യോഗികമായി സ്പെഷല് പ്രോസിക്യൂട്ടര് സ്ഥാനത്ത് ഇപ്പോഴും തുടരുന്നതിനാല് പോലീസ് അന്വേഷണത്തെപ്പറ്റി കൂടുതലൊന്നും പറയുന്നില്ലെന്നും അഡ്വ രഘുനാഥ് അറിയിച്ചു. അതേസമയം മധുവിന്റെ ബന്ധുക്കളും ആക്ഷന് കൗണ്സിലും പുതിയ പ്രോസിക്യൂട്ടറെ ആവശ്യപ്പെട്ട് രംഗത്തെത്തിയിട്ടുണ്ട്.
