കൊച്ചി: കൊച്ചി ക്യാൻസർ റിസർച്ച് സെന്ററിന് ബജറ്റില് 14.5 കോടി രൂപ അനുവദിച്ചു. സെന്ററിനെ മധ്യകേരളത്തിലെ അപെക്സ് ക്യാൻസർ സെന്ററായി വികസിപ്പിക്കുന്നതിന് തുക വിനിയോഗിക്കും. 360 കിടക്കകളുള്ള സെന്റർ കെട്ടിടത്തിന്റെ ഒന്നാംഘട്ട പണി നടന്നുകൊണ്ടിരിക്കുകയാണ്. ഈ സാമ്പത്തികവർഷംതന്നെ ഇത് പൂർത്തീകരിക്കുമെന്നും ധനമന്ത്രി ബജറ്റിൽ പറഞ്ഞു. കഴിഞ്ഞ എൽഡിഎഫ് സർക്കാരിന്റെ വികസന പദ്ധതികളിൽ ഏറ്റവും മുൻപന്തിയിലുള്ളതാണ് സിസിആർസിയുടെ വികസനം.
ഘട്ടംഘട്ടമായി വികസനം പൂർത്തിയാക്കുന്നതിന്റെ ഭാഗമാണ് ബജറ്റിലെ പ്രഖ്യാപനം. സംസ്ഥാനത്തെ മെഡിക്കൽ കോളേജുകൾക്ക് അനുവദിച്ച 250.7 കോടി രൂപയിൽ എറണാകുളം ഗവ. മെഡിക്കൽ കോളേജിന്റെ വികസനവും ഉൾപ്പെടും. ആരോഗ്യമേഖലയിൽ സാധാരണക്കാർക്ക് ആധുനിക ചികിത്സാസൗകര്യങ്ങൾ ലക്ഷ്യമാക്കുകയാണ് സംസ്ഥാന സർക്കാരിന്റെ ലക്ഷ്യം.
