ബ്രിട്ടന് : കൊറോണ വൈറസ് ബാധിതര്ക്ക് രോഗം തീവ്രമാകാതിരിക്കാന് ഫൈസര് വികസിപ്പിച്ച പാക്സ് ലോവിഡ് എന്ന ആന്റി വൈറല് മരുന്നിന് ബ്രിട്ടന് അംഗീകാരം നല്കി. ഇത്തരത്തില് അംഗീകാരം ലഭിക്കുന്ന രണ്ടാമത്തെ ആന്റി വൈറല് മരുന്നാണ് പാക്സ് ലോവിഡ്. ഒമിക്രോണ് വകഭേദം മൂലമുള്ള കോവിഡ് കേസുകള് യുകെയില് കുതിച്ചുയരുന്നതിനിടെയാണ് പുതിയ മരുന്നിന് അനുമതി ലഭിച്ചിരിക്കുന്നത്. കോവിഡിന്റെ ആദ്യ ഘട്ടത്തില് കഴിച്ചാല് ഫലപ്രദമാണ് പാക്സ് ലോവിഡെന്ന് ബ്രിട്ടനിലെ മെഡിസിന്സ് ആന്ഡ് ഹെല്ത്ത്കെയര് പ്രോഡക്ട്സ് റെഗുലേറ്ററി ഏജന്സി പറയുന്നു. ആദ്യ ലക്ഷണങ്ങള് കണ്ടെത്തി അഞ്ച് ദിവസത്തിനുള്ളില് പാക്സ് ലോവിഡ് കഴിക്കാനാണ് ഏജന്സിയുടെ നിര്ദ്ദേശം. ഉയര്ന്ന അപകട സാധ്യതയുള്ള രോഗികളില് ആശുപത്രി വാസവും മരണങ്ങളും തടയുന്നതില് പാക്സ് ലോവിഡ് 90 ശതമാനം ഫലപ്രദമാണെന്ന് ഫൈസര് അവകാശപ്പെടുന്നു. അതിവേഗം പടരുന്ന ഒമിക്രോണിനെതിരെയും മരുന്ന് ഈ കാര്യക്ഷമത തുടരുന്നതായി ലാബ് റിപ്പോര്ട്ടുകള് സൂചിപ്പിക്കുന്നു.
കുത്തിവെയ്പ്പിലൂടെ അല്ലാതെ മരുന്നായി കഴിക്കാമെന്നതിനാല് ഇത് നല്കുന്നതിന് ആശുപത്രി സംവിധാനങ്ങള് ആവശ്യമില്ലെന്ന് ബ്രിട്ടന് മെഡിക്കല് ഏജന്സി മേധാവി ജൂണ് റെയ്നെ പ്രസ്താവനയില് പറഞ്ഞു. രണ്ട് സജീവ ചേരുവകള് അടങ്ങിയ പാക്സ് ലോവിഡ് ദിവസം രണ്ട് നേരം എന്ന കണക്കില് അഞ്ച് ദിവസത്തേക്കാണ് കഴിക്കേണ്ടത്. ഈ ആന്റിവൈറല് ചികിത്സയുടെ 27.5 ലക്ഷം കോഴ്സുകള് ബ്രിട്ടന് സംഭരിച്ചിട്ടുണ്ട്. എച്ച്ഐവി, ഹെപ്പറ്റൈറ്റിസ് സി പോലുള്ള രോഗങ്ങളുടെ വൈറസുകളെ പെരുകാതെ നിയന്ത്രിക്കാന് കഴിയുന്ന പ്രൊട്ടിയേസ് ഇന്ഹിബിറ്റര് മരുന്നുകളുടെ ഗണത്തില് ഉള്പ്പെടുന്നതാണ് പാക്സ് ലോവിഡ്. മെര്ക്ക് വികസിപ്പിച്ച മറ്റൊരു കോവിഡ് മരുന്നിനും ബ്രിട്ടന് കഴിഞ്ഞ മാസം അനുമതി നല്കിയിരുന്നു. എന്നാല് ഉയര്ന്ന റിസ്ക് ഉള്ള രോഗികളുടെ ആശുപ്രതി വാസവും മരണങ്ങളും തടയുന്നതില് 30 ശതമാനം കാര്യക്ഷമത മാത്രമേ ഈ മരുന്ന് വാഗ്ദാനം ചെയ്യുന്നുള്ളൂ.
