ജയ്പൂർ: ദില്ലിയിൽ ശ്രദ്ധ വാക്കറിന്റെ കൊലപാതകത്തിന് സമാനമായ സംഭവം രാജസ്ഥാനിലും. ജയ്പൂരിൽ യുവാവ് ബന്ധുവായ സ്ത്രീയെ കൊന്ന് കഷ്ണങ്ങളാക്കി. പത്താക്കി മുറിച്ച മൃതദേഹ ഭാഗങ്ങൾ ഹൈവേയ്ക്ക് സമീപം ഉപേക്ഷിച്ച പ്രതിയെ പിന്നീട് പൊലീസ് അറസ്റ്റ് ചെയ്തു. ജയ്പൂർ സ്വദേശിയായ അനുജ് ശർമയാണ് രാജസ്ഥാൻ പൊലീസിന്റെ പിടിയിലായത്.
സംഭവം ഇങ്ങനെ
ഡിസംബർ 11 നാണ് വിധവയായ സ്ത്രീയെ കാണാനില്ലെന്ന് കാട്ടി ബന്ധുക്കൾ പൊലീസ് സ്റ്റേഷനിലെത്തി പരാതി നൽകിയത്. കേസിൽ ഇപ്പോൾ അറസ്റ്റിലായ അനൂജടക്കമുള്ള ബന്ധുക്കലാണ് ഇവരെ കാണാനില്ലെന്ന് കാട്ടി സ്റ്റേഷനിലെത്തി പരാതി നൽകിയത്. പൊലീസിൽ പരാതി നൽകിയ ശേഷം പിന്നീട് വീട്ടിലെത്തിയ അനൂജ് ചുമർ തുടയ്ക്കുന്നത് സഹോദരിയുടെ ശ്രദ്ധയിൽപ്പെട്ടതോടെയാണ് കൊലപാതകം ചുരുളഴിഞ്ഞത്. അനൂജ് ചുമരിലെ രക്തക്കറയാണ് തുടച്ചുനീക്കിയതെന്നായിരുന്നു സഹോദരിക്ക് സംശയം തോന്നിയത്. ഈ വിവരം അവർ വീട്ടിലുള്ളവരോട് പറഞ്ഞു. ഇതിന് പിന്നാലെ ബന്ധുക്കൾ പൊലീസിനെ വിവരമറിയിക്കുകയായിരുന്നു. പൊലീസ് വീട്ടിലെത്തി അനൂജിനെ വിശദമായി ചോദ്യം ചെയ്തു. ഈ ചോദ്യം ചെയ്യലിലാണ് കൊലപാതകത്തിന്റെ ഞെട്ടിക്കുന്ന വിവരങ്ങൾ പുറത്തുവന്നത്.
പൊലീസിന്റെ ചോദ്യം ചെയ്യലിൽ അനൂജ് കുറ്റം സമ്മതിക്കുകയായിരുന്നു. സ്ത്രീയെ ചുറ്റികകൊണ്ട് അടിച്ചു കൊന്ന ശേഷം മൃതദേഹം മാർബിൾ കട്ടറും ചുറ്റികയുമപയോഗിച്ച് പത്ത് കഷ്ണങ്ങളാക്കി മുറിച്ചു. പിന്നീട് ബക്കറ്റിലും കവറിലുമാക്കിയാണ് ഈ മൃതദേഹ ഭാഗങ്ങൾ ദില്ലിയിലേക്കുള്ള ഹൈവേയ്ക്ക് സമീപം ഒഴിഞ്ഞ പ്രദേശങ്ങളിൽ ഉപേക്ഷിച്ചത്.
കൊലപാതക കുറ്റം അനൂജ് സമ്മതിച്ചെങ്കിലും കൊലപാതക കാരണം ഇനിയും വ്യക്തമായിട്ടില്ല. കുറ്റകൃത്യത്തിന് അനൂജിനെ ആരെങ്കിലും സഹായിച്ചിട്ടുണ്ടോയെന്നതിൽ അടക്കം അന്വേഷണം തുടരുകയാണെന്നും ഡി സി പി പാരിസ് ദേശ്മുഖ് അറിയിച്ചു. കേസിൽ കൂടുതൽ അന്വേഷണം നടത്തിയാൽ മാത്രമേ കാര്യങ്ങൾ വ്യക്തമാകു എന്നും ഡി സി പി വ്യക്തമാക്കി.
