ഇരിട്ടി : ആറളം വൈൽഡ് ലൈഫ് ഡിവിഷനിലെ ആറളം, കൊട്ടിയൂർ വന്യജീവിസങ്കേതങ്ങളിൽ മൂന്നുദിവസമായി നടന്ന പക്ഷിസർവേ സമാപിച്ചു. ആറളത്ത് തുടർച്ചയായി നടക്കുന്ന 21-മത് സർവേയാണിത്. വന്യജീവിസങ്കേതത്തിൽ മുൻപ് കണ്ടിട്ടില്ലാത്ത ഒരിനം പക്ഷിയടക്കം 176 പക്ഷിജാതികളെ സർവേയിൽ കണ്ടെത്തി. കഷണ്ടിത്തലയൻ കൊക്ക് ആണ് പുതുതായി കണ്ടെത്തിയത്. ഇതോടെ വന്യജീവിസങ്കേതത്തിൽ കണ്ടെത്തിയിട്ടുള്ള മൊത്തം പക്ഷികളുടെ എണ്ണം 240 ആയി.ഇന്ത്യയിൽതന്നെ ആറളം വന്യജീവിസങ്കേതത്തിൽ മാത്രമാണ് തുടർച്ചയായി പക്ഷിസമ്പത്തിനെപ്പറ്റി ഇത്തരത്തിൽ ശാസ്ത്രീയനിരീക്ഷണം നടത്തുന്നത്.
ആറളം, കൊട്ടിയൂർ വന്യജീവിസങ്കേതങ്ങളിലെ 10 സ്ഥലങ്ങളിൽ 10 ഗ്രൂപ്പായി പക്ഷിനിരീക്ഷകരെ വിന്യസിച്ച് ഒരേസമയത്താണ് സർവേ നടത്തിയത്. ഞായറാഴ്ച ആറളം അസിസ്റ്റന്റ് വൈഫ് വാർഡൻ എൻ. അനിൽകുമാറിന്റെ മേൽനോട്ടത്തിൽ നടത്തിയ അവലോകനത്തിൽ നിരീക്ഷകസംഘങ്ങൾ അവരുടെ വനാനുഭവങ്ങൾ പങ്കുവെച്ചു. വയനാട് വെറ്ററിനറി കോളേജ് ലക്ചറർ ഡോ. റോഷ്നാഥ് രമേഷിന്റെ നേതൃത്വത്തിൽ സർവേഡേറ്റാ വിവരങ്ങൾ ഏകോപിപ്പിച്ച് റിപ്പോർട്ട് അവതരിപ്പിച്ചതോടെയാണ് സർവേ അവസാനിച്ചത്. വെള്ളിയാഴ്ചയാണ് പക്ഷിസർവേ ആരംഭിച്ചത്. ആറളം വൈൽഡ് ലൈഫ് വാർഡൻ വി. സന്തോഷ് കുമാറിന്റെ അധ്യക്ഷതയിൽ നടന്ന ചടങ്ങ് ചീഫ് കൺസർവേറ്റർ ഓഫ് ഫോറസ്റ്റ്സ് (വൈൽഡ്ലൈഫ്) പാലക്കാട് കെ.വി. ഉത്തമൻ ഉദ്ഘാടനം ചെയ്തു.
സെക്ഷൻ ഫോറസ്റ്റ് ഓഫീസർ വിനു കായലോടൻ, പക്ഷിനിരീക്ഷകരായ സി. ശശികുമാർ, സത്യൻ മേപ്പയൂർ എന്നിവർ സർവേയെ പറ്റി വിശദീകരിച്ചു. ആറളം അസിസ്റ്റന്റ് സെൽഫ് വാർഡൻ എൻ. അനിൽകുമാർ, ഡെപ്യൂട്ടി റെയ്ഞ്ച് ഫോറസ്റ്റ് ഓഫീസർ പ്രദീപൻ കാരായി എന്നിവർ സംസാരിച്ചു. കേരളത്തിനകത്തുനിന്നും പുറത്തുനിന്നുമായി 55-ഓളം പക്ഷിനിരീക്ഷകർ പങ്കെടുത്തു.
