പട്ടാമ്പി > തൃത്താല എസ്ഐയെ വണ്ടിയിടിച്ച കേസിൽ പ്രതി പിടിയിലായി. പട്ടാമ്പിയിൽ വച്ചാണ്‌ പ്രതി അലനെ പൊലീസ്‌ പിടികൂടിയത്‌. സംഭവം നടക്കുമ്പോൾ അലന്റെ കൂടെയുണ്ടായിരുന്ന സുഹൃത്ത്‌ അജീഷിനെ പിടികൂടാൻ സാധിച്ചിട്ടില്ല. അജീഷിനെക്കുറിച്ചുള്ള വിവരങ്ങൾ പൊലീസിന്‌ ലഭിച്ചിട്ടുണ്ട്‌.
ശനിയാഴ്‌ച രാത്രി 10 നും 11നും ഇടയ്‌ക്കാണ്‌ തൃത്താല എസ്‌ഐ ശശിയെ അലൻ കാറിടിച്ചു വീഴ്ത്തിയത്. സംഭവം നടന്ന ശേഷം അലൻ അതിവേഗത്തിൽ സഞ്ചരിക്കുന്ന സിസിടിവി ദൃശ്യങ്ങൾ പൊലീസിന്‌ ലഭിച്ചിരുന്നു. ഈ ദൃശ്യങ്ങളുടെ സഹായത്താലാണ്‌ പൊലീസ്‌ പ്രതിയെ പിടികൂടിയത്‌.
വാഹന പരിശോധനയ്ക്കിടെയാണ് അലൻ ശശിയെ കാറിടിച്ചു വീഴ്ത്തിയത്. ദുരൂഹ സാഹചര്യത്തിൽ കണ്ട വാഹനം പരിശോധിക്കുന്നതിനിടെയായിരുന്നു സംഭവം. അപരിചിത വാഹനം പരിശോധിക്കുന്നതിനിടെ ഇടിച്ചു വീഴ്ത്തുകയായിരുന്നുവെന്നും ഭാഗ്യം കൊണ്ടാണ് രക്ഷപ്പെട്ടതെന്നും എസ്‌ഐ പറഞ്ഞു. എസ്ഐയെ മനഃപൂര്‍വം വാഹനം ഇടിക്കുകയായിരുന്നുവെന്ന് തൃത്താല സിഐ പറഞ്ഞു. എസ് ഐ യുടെ ശരീരത്തിലൂടെ വാഹനം കയറിയിറങ്ങിയിരുന്നു.
