ന്യൂഡൽഹി: അധികാരക്കൊതി ഗവർണർ ആരിഫ് മൊഹമ്മദ് ഖാന്റെ സാമാന്യബോധംതന്നെ നശിപ്പിച്ചെന്ന്‌ വി ശിവദാസൻ എംപി പ്രസ്‌താവനയിൽ പറഞ്ഞു. കണ്ണൂരിന്റെ ചരിത്രം അദ്ദേഹത്തിന് അറിയാത്തതാകും. ഒരു നാടിനെ ഒന്നടങ്കം അടച്ചാക്ഷേപിക്കുക വഴി സ്വന്തം നിലവാരമോ അഥവാ അതിന്റെ അഭാവമോ ആണ് ഗവർണർ പ്രകടിപ്പിച്ചത്‌. ബ്രിട്ടീഷ് സാമ്രാജ്യത്തോടും അവരുടെ ഗവർണർമാരോടും പൊരുതിനിന്ന ധീരമായ ചരിത്രമാണ് കണ്ണൂരിലെ ജനതയ്ക്കുള്ളത്. ആ ചരിത്രം തമസ്കരിക്കാൻ ഒരു ഗവർണർക്കും ആകില്ല. ക്ഷണിച്ചുവരുത്തിയ മാധ്യമങ്ങളിൽ ചിലരിൽനിന്ന്, ചോദ്യം ഉയരും എന്ന ഭീതികൊണ്ട് ഒളിച്ചോടിയ ചരിത്രം അദ്ദേഹത്തിനുണ്ട്. ആ അസഹിഷ്ണുതയുടെ തനിയാവർത്തനമാണ് വിദ്യാർഥികൾ കെട്ടിയ ബാനറുകളോടും പ്രകടിപ്പിച്ചതെന്ന്‌ ശിവദാസൻ പറഞ്ഞു.
