ശൂരനാട്> കേരളത്തിലെ ആശുപത്രികളുടെയും പ്രാഥമിക ആരോഗ്യ കേന്ദ്രങ്ങളുടെയും പേര്‌ ‘ആയുഷ്മാൻ ആരോഗ്യ മന്ദിർ’ എന്നാക്കണമെന്നുള്ള കേന്ദ്ര നിർദ്ദേശം കേരളത്തിൽ നടപ്പാക്കില്ലെന്ന് ആരോഗ്യ മന്ത്രി വീണ ജോർജ് പറഞ്ഞു. ചക്കുവള്ളിയിൽ ചേർന്ന കുന്നത്തൂർ മണ്ഡലം നവകേരള സദസ്സിൽ സംസാരിക്കുകയായിരുന്നു മന്ത്രി.
31 മുതൽ ആയുഷ്മാൻ ആരോഗ്യ മന്ദിർ എന്ന് ആരോഗ്യ കേന്ദ്രങ്ങളുടെ പേരുമാറ്റണമെന്നാണ് നിർദ്ദേശം ലഭിച്ചിരിക്കുന്നത്. ഇത് നമ്മുടെ സംസ്കാരത്തെയും ഭാഷയേയും പരിഗണിക്കാതെ ഒരു ജനതയുടെ മേലുള്ള കടന്നുകയറ്റമാണ്. അത്‌ അംഗീകരിക്കാനാവില്ല. സംസ്ഥാനത്ത് സംഘപരിവാറിന്റെ ഗുജറാത്ത് മോഡൽ കലാപത്തിനുള്ള ശ്രമങ്ങൾക്ക് ഗവർണറെ ഉപയോഗിക്കുകയാണ്‌. സ്വാതന്ത്ര്യത്തിനായി സമരം ചെയ്ത പാരമ്പര്യമാണ് എസ്എഫ്ഐ ക്കുള്ളതെന്നും മന്ത്രി പറഞ്ഞു.
പണമില്ലാത്തതിന്റെ പേരിൽ ആർക്കും ചികിത്സ നിഷേധിക്കാത്ത ഏക സംസ്ഥാനമായി കേരളം മാറിക്കൊണ്ടിരിക്കുകയാണ്. അവയവമാറ്റ ശസ്ത്രക്രിയ അടക്കം മുമ്പ് സ്വകാര്യ മേഖലയിൽ മാത്രം ലഭ്യമായിരുന്ന നൂതന ചികിത്സാ രീതികൾ എല്ലാം ഇന്ന് സർക്കാർ ആശുപത്രികളിൽ ലഭ്യമാണ്. ഇത്തരത്തിൽ സാധാരണക്കാരന് വേണ്ടി വികസന മുന്നേറ്റവുമായി മുന്നോട്ട് പോകുന്ന എൽഡിഎഫ്‌ സർക്കാരിനെ സാമ്പത്തികമായി ഞെരുക്കുകയാണ് കേന്ദ്രസർക്കാരെന്നും മന്ത്രി പറഞ്ഞു.
