പരവൂർ : കലയ്ക്കോട്ട് തീവണ്ടിപ്പാളത്തിൽ ആത്മഹത്യ ചെയ്യാനെത്തിയ യുവതിയെ നാട്ടുകാർ പിന്തിരിപ്പിച്ചു. ഞായറാഴ്ച ഉച്ചയ്ക്ക് ഒന്നിന് കലയ്ക്കോട് ആശുപത്രിക്കുസമീപമാണ് സംഭവം. മയ്യനാട് സ്വദേശിനിയാണ് യുവതി. ബസിൽനിന്നിറങ്ങി റെയിൽവേ ട്രാക്കിലേക്ക് യുവതി കരഞ്ഞുകൊണ്ട് പോകുന്നതുകണ്ട പ്രദേശവാസി യുവതിയെ തടഞ്ഞുനിർത്തുകയായിരുന്നു. വിവരമറിഞ്ഞെത്തിയ പഞ്ചായത്ത് പ്രസിഡന്റ് അമ്മിണിയമ്മ യുവതിയോട് വിവരങ്ങൾ ചോദിച്ചറിഞ്ഞു. വിവാഹിതയായ യുവതി മറ്റൊരാളുമായി പ്രണയത്തിലാണ്. ഈ യുവാവുമായി തെറ്റിയതിനെത്തുടർന്നുണ്ടായ വിഷമത്തിലാണ് ജീവിതം അവസാനിപ്പിക്കാനൊരുങ്ങിയതെന്ന് യുവതി പറഞ്ഞു. യുവാവും സ്ഥലത്തെത്തിയിരുന്നു. നാട്ടുകാർ വിവരമറിയിച്ച് ഏറെനേരത്തിനുശേഷമാണ് പോലീസ് എത്തിയതെന്നു പരാതിയുണ്ട്. ഒരു പോലീസുകാരൻ പ്രസിഡന്റിനോട് തട്ടിക്കയറിയതായും പറയുന്നു.
പോലീസ് യുവതിയെയും യുവാവിനെയും താക്കീതുചെയ്തുവിട്ടു. പോലീസുകാരനെതിരേ എ.സി.പി.ക്ക് പരാതി നൽകുമെന്ന് പഞ്ചായത്ത് പ്രസിഡന്റ് എസ്.അമ്മിണിയമ്മ പറഞ്ഞു.
