കോട്ടയം : ഗുണ്ടാസംഘങ്ങൾക്കിടയിൽ സ്വാധീനം ഉറപ്പിക്കുന്നതിന് വേണ്ടിയാണ് കോട്ടയത്ത് യുവാവിനെ തല്ലിക്കൊന്ന് പോലീസ് സ്റ്റേഷന് മുന്നിലിട്ടതെന്ന് പോലീസ്. പ്രതിയായ ജോമോനെ നേരത്തെ കാപ്പാ ചുമത്തി നാടുകടത്തിയിരുന്നു. അടുത്തിടെ കാപ്പാ കേസിൽ അപ്പീൽ നൽകി ഇയാൾ തിരിച്ചെത്തി. എന്നാൽ തിരിച്ചെത്തിയപ്പോൾ ഗുണ്ടാസംഘങ്ങൾക്കിടയിൽ ജോമോന് പരിഗണന ലഭിച്ചില്ല. തന്റെ മേധാവിത്വം നഷ്ടമാകുമെന്ന് ഭയന്നാണ് ജോമോൻ കൊലപാതകം നടത്തിയതെന്നും പോലീസ് പറഞ്ഞു. പുലർച്ചെ ഒന്നരയ്ക്കാണ് ഷാനിനെ കാണാനില്ലെന്ന് അമ്മയും സഹോദരിയും പരാതി നൽകിയത്. പിന്നാലെ പോലീസ് വാഹന പരിശോധനയടക്കം ഊർജിതമാക്കി. 3.30-ഓടെയാണ് പോലീസ് സ്റ്റേഷന് മുന്നിലെത്തി ഒരാൾ ബഹളംവെച്ചത്. നോക്കിയപ്പോൾ മൃതദേഹവും കണ്ടതായും ജില്ലാ പോലീസ് മേധാവി എസ്.ശില്പ മാധ്യമങ്ങളോട് പറഞ്ഞു. കൊല്ലണമെന്ന ഉദ്ദേശ്യത്തോടെയല്ല ഷാനിനെ മർദിച്ചതെന്നാണ് പ്രതിയുടെ മൊഴിയെന്നും ഇയാളെ വിശദമായി ചോദ്യംചെയ്തുവരികയാണെന്നും എസ്.പി. വ്യക്തമാക്കി.
തിങ്കളാഴ്ച പുലർച്ചെയാണ് ജോമോൻ വിമലഗിരി സ്വദേശിയായ ഷാൻബാബുവിനെ തല്ലിക്കൊന്ന് കോട്ടയം ഈസ്റ്റ് പോലീസ് സ്റ്റേഷന് മുന്നിലെത്തിയത്. ഷാനിനെ കൊലപ്പെടുത്തിയതായി ഇയാൾ പോലീസുകാരോട് വിളിച്ചുപറയുകയായിരുന്നു. പിന്നാലെ പോലീസെത്തി ജോമോനെ പിടികൂടുകയും ചെയ്തു. കഴിഞ്ഞദിവസം രാത്രി ഒമ്പതരയോടെയാണ് ഷാനിനെ ജോമോൻ ഓട്ടോയിലെത്തി തട്ടിക്കൊണ്ടുപോയത്. തുടർന്ന് ക്രൂരമായി മർദിച്ച് കൊലപ്പെടുത്തുകയായിരുന്നു. ഷാനിന്റെ ശരീരത്തിൽ ഇരുമ്പ് വടി കൊണ്ട് മർദനമേറ്റതിന്റെ നിരവധി പാടുകളുമുണ്ട്. കാപ്പാ ചുമത്തി പുറത്താക്കിയതോടെ ജോമോന് കോട്ടയത്തെ ഗുണ്ടാസംഘങ്ങൾക്കിടയിൽ പ്രാധാന്യം ഇല്ലാതായെന്നാണ് പോലീസ് പറയുന്നത്. കോട്ടയത്ത് തിരിച്ചെത്തിയിട്ടും സുഹൃത്തുക്കളാരും ഇയാളുമായി സഹകരിക്കുകയും ചെയ്തില്ല. അതിനാൽ തന്റെ മേധാവിത്വം ഉറപ്പാക്കാൻ എതിരാളി സംഘത്തിൽപ്പെട്ടവരെ ലക്ഷ്യമിടുകയായിരുന്നു. കൊല്ലപ്പെട്ട ഷാൻബാബു മറ്റൊരു ഗുണ്ടയായ സൂര്യന്റെ സുഹൃത്താണ്. ജോമോനും സൂര്യനും കോട്ടയത്ത് ഗുണ്ടാസംഘങ്ങളുണ്ട്. സൂര്യൻ എവിടെയുണ്ടെന്നറിയാനാണ് ഷാനിനെ പ്രതി തട്ടിക്കൊണ്ടുപോയത്. തുടർന്ന് ഇരുമ്പ് വടി കൊണ്ട് ക്രൂരമായി മർദിച്ചു. യുവാവിനെ കൊല്ലണമെന്ന് ഉദ്ദേശിച്ചിരുന്നില്ലെന്നാണ് ജോമോൻ പോലീസിനോട് പറഞ്ഞിട്ടുള്ളത്. കൃത്യം ചെയ്തത് ഒറ്റയ്ക്കാണെന്നും ഇയാൾ മൊഴി നൽകിയിട്ടുണ്ട്.
അതേസമയം കൃത്യത്തിൽ കൂടുതൽപേർക്ക് പങ്കുള്ളതായാണ് പോലീസിന്റെ സംശയം. പ്രതി ജോമോനെ വിശദമായി ചോദ്യംചെയ്തുവരികയാണ്. സംഭവത്തിൽ ഉൾപ്പെട്ട കൂടുതൽപേർ വൈകാതെ പിടിയിലാകുമെന്നും സൂചനയുണ്ട്. കൊല്ലപ്പെട്ട ഷാൻബാബുവിന്റെ പശ്ചാത്തലവും പോലീസ് അന്വേഷിക്കുന്നുണ്ട്. ഇയാൾക്കെതിരേ കോട്ടയത്തെ പോലീസ് സ്റ്റേഷനുകളിൽ കേസുകളൊന്നുമില്ല. എന്നാൽ മറ്റിടങ്ങളിൽ കേസുകളുണ്ടോ എന്നതും പോലീസ് അന്വേഷിച്ചുവരികയാണ്. തുടർച്ചയായ ഗുണ്ടാ ആക്രമണങ്ങളുടെ പശ്ചാത്തലത്തിൽ കോട്ടയത്തെ സുരക്ഷ വർധിപ്പിക്കാനും പോലീസ് തീരുമാനിച്ചിട്ടുണ്ട്.
