പത്തനംതിട്ട : സംസ്ഥാനത്ത് കോവിഡ്മൂലം മാതാപിതാക്കൾ നഷ്ടപ്പെട്ട കുട്ടികൾക്കുള്ള ധനസഹായ വിതരണത്തിന്റെ രണ്ടാം ഘട്ടത്തിന് സംസ്ഥാന സർക്കാർ പണം അനുവദിച്ചു. രണ്ടാം ഘട്ടത്തിൽ 47 കുട്ടികൾക്കായി 1.48 കോടി രൂപയാണ് അനുവദിച്ചത്. ഇതോടെ രണ്ട് ഘട്ടമായി സംസ്ഥാനത്ത് 103 കുട്ടികൾക്കാണ് സഹായമെത്തുന്നത്. ജില്ലാ കളക്ടർമാർ മുഖേന കുട്ടികളുടെ വിവരങ്ങൾ ഉറപ്പാക്കി പി.എം.കെയർ പോർട്ടലിൽ സമർപ്പിച്ചിരുന്നു. അച്ഛനും അമ്മയും കോവിഡ് ബാധിച്ചുമരിച്ചവർ, മാതാപിതാക്കളിൽ ഒരാളെ നേരത്തെ നഷ്ടപ്പെടുകയും രണ്ടാമത്തെയാൾ കോവിഡ് ബാധിച്ച് മരിക്കുകയും ചെയ്തവർ എന്നിങ്ങനെ അനാഥരായ കുട്ടികളെ രണ്ടുതരത്തിലാണ് കണക്കാക്കിയത്. ജില്ലാ ശിശു സംരക്ഷണ ഓഫീസർമാർ പരിശോധന നടത്തിയാണ് പട്ടിക തയാറാക്കിയത്.
രണ്ടാം ഘട്ടത്തിൽ കൊല്ലം ജില്ലയിൽനിന്നാണ് കൂടുതൽ കുട്ടികൾക്ക് സഹായം ലഭിക്കുന്നത്. ജില്ലയിലെ എട്ട് കുട്ടികൾക്കായി 24.16 ലക്ഷം രൂപയാണ് അനുവദിച്ചത്. ഓരോ കുട്ടിക്കും മൂന്ന് ലക്ഷം വീതം ഫിക്സഡ് ഡിപ്പോസിറ്റായി ബാങ്കിൽ നിക്ഷേപിക്കും. ഇവർക്ക് പ്രതിമാസ ധനസഹായമായി 2000 രൂപ വീതവും ലഭിക്കും. ഒറ്റത്തവണ സഹായമായ മൂന്ന് ലക്ഷം രൂപ പ്രകാരം 1.41 കോടിയും 2000 രൂപ നിരക്കിൽ പ്രതിമാസ ധനസഹായമായി 7,64,000 രൂപയുമാണ് അനുവദിച്ചത്. മൂന്ന് ലക്ഷത്തിന്റെ ഫിക്സഡ് ഡിപ്പോസിറ്റ് 18 വയസ്സിന് ശേഷം കുട്ടിക്ക് പിൻവലിക്കാം. 18 വയസ്സ് പൂർത്തിയാകുന്നതുവരെ പ്രതിമാസ തുകയും അനുവദിക്കും. പദ്ധതിയുടെ ആദ്യ ഘട്ടത്തിൽ 12 ജില്ലകളിൽനിന്നായി 56 കുട്ടികൾക്ക് സ്ഥിരനിക്ഷേപമായും പ്രതിമാസ ധനസഹായമായും 1.73 കോടി രൂപയാണ് അനുവദിച്ചിരുന്നത്.
കുട്ടികളുടെ വിവരങ്ങൾ ജില്ലകളിൽ ശേഖരിക്കുകയും കേന്ദ്ര ബാലാവകാശ സംരക്ഷണ കമ്മിഷൻ തയ്യാറാക്കിയ ബാൽസ്വരാജ് പോർട്ടലിൽ രേഖപ്പെടുത്തുകയുമാണ് ചെയ്യുന്നത്. ഈ കുട്ടികളുടെ ബിരുദംവരെയുള്ള പഠനച്ചെലവുകൾ മുഖ്യമന്ത്രിയുടെ ദുരിതാശ്വാസ നിധിയിൽനിന്ന് വഹിക്കും. കോവിഡ്മൂലം മാതാപിതാക്കൾ നഷ്ടപ്പെട്ട കുട്ടികൾക്ക് 10 ലക്ഷം രൂപ ധനസഹായവും സൗജന്യ സ്കൂൾ വിദ്യാഭ്യാസവും കേന്ദ്രസർക്കാരും പ്രഖ്യാപിച്ചിട്ടുണ്ട്.
